SULAT KABA LAMO: UJANG DAN UWOK ROMEO DAN JULIET TBS

CINTO SULAT KABA LAMA!

Karya:  Dak Ujang (GY)

“Cring! Cring! Crinnnnnnnnnnnnng” loceng sekolah pukul satu bobunyi lamo. Itu tando sesi pagi di TBS dah  tamat.  Dak Ujang toghuih molughu poi ko bolakang lab bosobolahan Balai Tunku Besar Tampin. Disitulah tompeh dio bosamo tigo ompek oghang budak-budak sesi pagi yang ado mato air budak sesi potang bojumpo sokojap. Anak-anak jantan bujang kochik macam Dak Ujang yang baghu tumbuh taji sompek iyolah monaikan syok batin dalaman sokojap sobolon menaiki bas sekolah yang dah sodia monunggu kek sobolah pintu masuk sekolah. 

Dak Ujang ko ni? Atau Ghazali Yasin? peristiwo kek Tonyamor dokek Tanjong.

Kek bolakang lab itulah tompek budak-budak momboghi atau monoghimo sughat cinto masing-masing. Itu yang jonih bogani. Kok tak ado sughat pun dapek sembang-sembang, golak kotawo dan main mato pun jadilah. Moncuit yo anak gimau masing-masing.

Ado yo kenkawan yang bocintan-cintan tak bogani nunjuk dopan-dopan. Jonih tu topaksolah guno bantuan daghi budak junior kito untuk sampaikan sughat kek awek masing-masing. Bilo jumpo bosoliseh di mano-mano tompek yang gamai di kawasan sekolah masing-masing buek dek yo, seolah-olah tak ado apo-apo hubungan antagho mereka. Itulah yang tojadi kek senior Dak Ujang yang dipangge eh Abang Kab  yang monjalin hubungan sonyap-sonyap dongan AiKay budak Padang Sebang yang ado igheh-igeh Seniwati Saadiah maso mudo-mudo dulu. Abang Kab tu pongolek dan nak jago namo sobab dio prefect. Tompi kek Dak Ujang tak dapek deh nyughok an rahsio eh doh. Sokileh ikan di air dah tau jantan botino eh. Itulah tajamnyo goghak hati Dak Ujang tu!

Bilo Dak Ujang merapati Dak Uwok kek situ toguih dio ditanyo ‘Bulih tak kito jumpo this Saturday?’

Alamak, komap bona aka pikeran Dak Ujang masa itu sobab haghi tu dah Komih. Cumo ado satu haghi sotongah yo lai nak kotiar caghi duit.

Topike kek Dak Ujang ‘bilo ado maso nak caghi duit nih. Sekughang-kughang eh sopuluh inggit mesti ado dalam tangan baghu cukup nak bawak Dak Uwok ko Molako’.

Nak heghet kek Tampin yo tak bulih. Pokan Tampin tu kochik bona. Dak Ujang takut oghang kampung atau sodagho dio dan Dak Uwok kok ado yang nampak nanti.  Lai pun kek panggung wayang Pearl dan Cathay tu gamai bona kenkawan sekolah yang nengok wayang cheap matinee haghi Sabtu. Kok tengok wayang kek situ gusak program. Kono kacau daun yo nanti.

Ponah satu kotiko dulu bilo dio tengok wayang dongan Dak Uwok kek Panggung Pearl kerusi eh kono tondang kek budak bosa yang duduk bolakang Dak Ujang. Maso tu Dak Ujang baghu nak cubo-cubo lotak  an tangan eh kek bahu Dak Uwok. Apo lai, tokojut bosa Dak Ujang dan toghuih hontok iyolah  macam tikuih jatuh ko bogheh!

Dek tak ondak nak lopehan poluang Dak Ujang pun jawab ‘Ok, good idea sweetheart. This Saturday Uwok tunggu kek bus stand Tai Lye sobolah gerai Cino songau yang jua gokok tu dalam kul 9 pagi. Uwok naik bas dulu. Bilo bas nak jalan baghu Ujang naik tau’. 

Sambil monguitkan bulu koning kek Dak Uwok Dak Ujang pun toghuih bojalan monuju kek bas Eng Giap yang sodang monunggu kek pintu bosa sekolah untuk mongangkut budak-budak yang tingga di Repah, Jeram, Air Mawang, Renggoh, Johol dan sejauh Kualo Johol.

Dalam bas 44 pasengger tu ponoh boghimpit macam sardin. Laluan tongah bas tu pun budak-budak kono bodighi. Macam-macam jonih bau. Ado yang masam. Ado yang hapak. Yang hanyir macam bau ikan haruan pun ado. Dan bilo ado yang tokontut mang ai macam tikuih mampuih bau eh. Solalu yang suko buek kojo molopeh angin busuk tu Chalat. Bilo budak maghah kek dio apo jawab eh ‘Eden yang gugi tak gaduh. Ekau yang dapek untung pulak yang heboh!’.

Sepanjang perjalanan pulang tu bas yang dinaiki bogoghak polahan yo.  Kojap-kojap bas kono boghonti bilo loceng dibunyikan untuk monughunkan budak sepanjang jalan tu. Kok Bang Kudran yang mawak bas tu elok sobab dio tak brek mongojut. Tompi kalau Bang Zakaria Sumbi Omeh yang mawak alamat bolago macam nak tosungko budak-budak yang bodighi tomasuklah budak pompuan.

Kadang-kadang tergesel punggung Dak Ujang dongan punggung budak pompuan yang samo-samo bodighi. Tompi itu sumo tak jadi hal kek dio doh. Bagi Dak Ujang walau dimano dio berado ingatan dio totap fokus kek Dak Uwok. Walaupun ado kenkawan yang ngobaan yang Dak Uwok tu tongget dan debab sikit tompi daghi kacomato Dak Ujang Dak Uwoklah gadis yang paling cantik dalam dunio ni. Dio anggap  Dak Uwok tu macam Puteri Jannatunnaim datang dari syurga! Cukup maghah Dak Ujang bilo ado budak yang ngejek dio yang Dak Uwok tu gopong dan Dak Ujang kughuih macam cicak kubin!

Bilo sampai kek ghumah lobih kughang puko duo sotongah potang Dak Ujang toguih goncang tabung buluh tompek simpan duit siling dio.  Dio cungke-cungke dapek yolah dikumpokan dalam soinggit. Itulah sado eh! Tibo-tibo poning kopalo Dak Ujang momikekan macam mano cagho eh nak nambah sombilan inggit lai!

Tongah monyuap nasi Dak Ujang topike macam-macam helah. Satu cagho, bulih mintak kek omak eh. Dak Ujang akan katokan ado kelas  tambahan haghi Sabtu. Campo duit tabung dio akan ado duo inggit. Dak Ujang kono yo caghi lapan inggit lai. Nak poi moncaghi tolo itek kek sawah dopan ghumah tu tak mungkin ado lai sobab bukan musim monuai maso tu. Tak lamo dulu bojooh Dak Ujang dapek bojua tolo itek Ochu Sinap yang solalu membuang tolo kek sawah omak Dak Ujang!

Lopeh yo makan Dak Ujang mundar mander koluar ko dalam daghi dapo ko soghambi, dagi soghambi ko dapor balik. Gelagat Dak Ujang macam oghang tak boghapo senter! Maso tu omak eh ado kek laman tongah nyomo mughan. Mongiut lantai papan ghumah eh yang jungkang jungkit tu bilo dipijak kek Dak Ujang. Omak eh ghalit yo monyolosaikan padi yang lombab tu untuk dijomo. Dio tak highau langsung kojo yang dibuek kek Dak Ujang di ateh ghumah tu doh.

Tibo-tibo todotik hati Dak Ujang nak ninjau bilik Abang Yah kek pangka ghumah. Abang Yah guru lepasan SITC Tanjung Malim yang baghu mongajar duo tahun kek Sekolah Datuk Undang Kamat di Ulu Nuri tak ado ghumah maso tu. Dio ado di sekolah molatih pasukan bolasepak untuk masuk pertandingan akhir  antagho sekolah-sekolah peringkat Kuala Pilah. Dalam hati Dak Ujang ‘Eloklah ekau tak ado kek ghumah ngang. Kok ado susah yo den nak buek kojo!’.

Masuk-masuk yo kek pangka ghumah tu toboliak bosa biji mato Dak Ujang. Dio tonampak sulat kaba lama botimbun kek sudut tiang sobolah mejo study Abang Yah. Kopalo Dak Ujang yang lonjong macam buah kana tu toguih ghengan. Tak ado lai gaso kusut masai doh.

‘Wah, ini sulat kaba lama banyak bagus. Thank you very very much Bang Yah oi. You have saved my life lah!’ bisik hati Dak Ujang.

Bilo dapek joki topijak tu, Dak Ujang pun tak lengah-lengah lai doh. Dio toghuih koluarkan timbunan sulat kaba lama tu dan diikek kuek-kuek. Mongengkeh dio monaikan sulat kaba tu ateh bosika nak poi jua kek kodai Haji Suman. Hai, logo, logo boto-boto kopalo Dak Ujang. Duit yang dicaghi-caghi tu dah gerenti dapek. ‘Botuah kau Dak  Uwok. Sulat kaba ni joki kito. Bang Yah, you are marvelous, marvelous. Thank you brader for ‘langganing’ the newspaper!’.

Sambil mongayuh basikal ko kodai Dak Ujang bodendang-dendang macam oghang mabuk. Dio topokek tololong monyanyi lagu ‘Termenong’ nyanyian Jeffidin yang monjadi siulan anak mudo maso tu. Sapo yo yang dio jumpo habis ditogo eh. Dak Ujang ni memang poghamah budak eh dan dio suko amek-amek bokawan dongan oghang tuo-tuo. Antagho kawan baik dio kek kampong tu Pak Cik Yatim Molaya, Abang Aziz Montegheh, Bang Mansor Yankee dan Pak Cik Bachik Bulin.  Boghompek tu solalu main dam dongan Dak Ujang kek kodai Suboh lopeh dio balik sekolah. Kek Renggoh tu tak ado sapo yang dapek mongalahkan Dak Ujang. Bojooh boto Dak Ujang solalu dapek makan bolanjo dio oghang.

Bilo sampai kek kaki Bukit Pulai yang tinggi togak sobolah kobon gotah cino Ling Kong, ayah kawan sekolah se Lau Kin Kah yang duduk kek pokan Air Mawang tu, Dak Ujang topaksolah tughun. Monchungap-cungap deh monolak bosika sambil monyanyi-nyanyi lagu ‘Bulan dan Juga Angin’ pulak. Lagu nyanyian P. Ramlee dan Normadiah tu memang kogomaan Dak Ujang. Senikato lagu tu sungguh bermakno. Bilo dinyanyikan dongan penuh perasaan Dak Ujang togaso seolah-olah dio dapek menyampaikan gaso ghindu eh kek Dak Uwok melalui angin yang lalu!

Asrama TBS

Tibo-tibo tokojut bosa Dak Ujang bilo Tok Dukun Wahab Kocopong koluar susuk sasau daghi somak kek topi jalan tu. Mungkin dio tughun daghi ateh bukit tu moncaghi ughek  kayu untuk dijual. Tok Dukun botanyo ‘Wah, banyak surat kobar ekau bawak ni Jang?’.  

Jawab Dak Ujang ‘Ado yo sikit Tok Dukun. Bang Yah se sughoh jua ni’.

Tok Dukun Wahab Kocopong yang tokona hebat dongan ilmu firasatnyo tu sonyum yo deh bilo nonga jawapan daghi Dak Ujang tu. Agak eh dio tau yang Dak Ujang dah pomongak an dio!

Sampai kek kodai Haji Suman sulat kaba tu ditimbang. Bulih tahan yo boghek eh. Dio kono guno ponimbang yang bosa. Alat ponimbang kochik tak naik mato daching tu doh.  Haji Suman kigho dongan sompua eh dan boghitau ‘Sumo eh lapan inggit limo puluh sen Jang’.

Dak Ujang tak cakap apo-apo. Tosengeh yo deh bilo toghimo duit banyak tu.  Yang sen-sen eh tu  dapeklah Dak Ujang boli gulo kicap, minam sobotol air sarsi Long Chan dan makan kueh sokoping kek kodai Suboh yang tolotak sobolah pokok kuwinin bosa kek simpang jalan Renggoh botontangan dongan jalan nak poi ko Kampung Payo tu.

Bilo Dak Ujang kayoh basikal maso balik ghumah dio topike ‘dapek lapan inggit kono bagi duo - dapek ompek inggit soghang.  Ompek inggit campo duo inggit yang ado masih lai 

kughang ompek inggit nak bagi cukup sopuluh inggit!’.

Bilo sampai ghumah Dak Ujang pun kono susun kotiar baghu. Dio pike elok diboghosihkan bilik Bang Yah  dan seterika sekali baju dan soluar Bang Yah yang bolon bolipek lai tu. Mintak-mintak kang bilo dio tengok bilik eh boghosih dan baju soluar dio dah bogosok Dak Ujang pike takkanlah dio nak ambik ompek inggit bahagian dio tu doh!

Osah, jerangkap samar Dak Ujang mongono. Bilo Abang Yah balik tengok bilik eh bogosih dan baju eh dah elok bogosok Bang Yah nampak sonyum giang. Dio boghi Dak Ujang ompek inggit . Sambil mongambek duit tu Dak Ujang golak dalam hati eh ‘haghi ini kau kono lai kek den Yah oi. Nasib kau lah!’.

Bilo dah dapek ompek inggit tu Dak Ujang kobaan kek Bang Yah yang surat kaba eh dah dijual. Dio pun acah-acah hulurkan duit tu kek Bang Yah yang luguih bondo bona-bona. Apo jawab Bang Yah ‘ambiklah kek kau Jang’.  Dak Ujang jawab ‘Mokasihlah Bang Yah’. 

Sambil koluar daghi pangka ghumah tu Dak Ujang tosengeh dan dalam hati eh mongoletek togolak soghang-soghang sambil bokato pompolahan ‘Osah, cikgu sokolah ni bangang yo gupo eh. Sonang yo den ngakaan ekau!’.Waduh! Handa kau Dak Ujang.

 TBS hari ini. Agak eh waktu adegan sulat kaba lama dulu gimanolah TBS?

Pagi esok tu dio koluar ghumah pakai unifom sekolah – baju putih soluar putih. Sampai di Tampin Dak Ujang kono tukar pakaian. Mano tukar baju dan soluar? Kek tandas busuk bas stand Tampin. Mano simpan baju dan soluar tu? Kek kodai buku Mustafa. Itulah satu-satunya  kodai buku oghang Melayu di Tampin bosompadanan pokan Pulau Sebang.  

Bilo solosai tukar pakaian Dak Ujang pun bagi signal mintak Dak Uwok naik bas Tai Lye yang nak botolak ko Molako. Dak Uwok duduk kek tongah-tongah bas. Bilo bas bogoghak yo Dak Ujang pun naik bas dan toghuih duduk bolakang sokali. Bilo Dak Ujang dah yakin tak ado oghang yang dio kona ado dalam bas tu baghulah dio poi duduk sobolah Dak Uwok.

Kok bas tu belok ko kighi dio botahan koghehkan bodan eh. Bahu Dak Uwok pun monghimpit bahu Dak Ujang. Bilo bas belok ko kanan Dak Ujang lopehan bodan eh pulak sampai toghasak bodan Dak Uwok yang montok tu kek dinding bas. Kok Dak Uwok botanyo sesuatu kek Dak Ujang, kok dio donga pun dio buek tak donga dan mintak ulang balik ‘I beg your pardon. I can’t hear you!’. Camtulah gagam anak bujang yang ibarat ayam jantan baghu bolaja bokokok dan solemo pun baghu kogheng tu.  Lupo deh yang dio tu masih bujang sunti lai. Dio ingat dio dah bosa panjang.   

Sampai kek bas stand Molako tak ado gisau hati Dak Ujang doh. Apo tidak eh, bawak Dak Uwok duit dalam poket ado ompek boleh inggit – tomasuk singgit yang dapek yo dio kechek kek omak eh. Bukan sajo dapek makan nasi sodap, Dak Ujang bawak Dak Uwok nengok wayang sambil makan kuci. Lopeh tu sompek makan air batu bandung dan poi duduk lepak-lepak kojap kek pantai Bandar Hilir.

Kek bangku bosi tompek koduo anak bujang dan dagho sunti tu duduk tak ado sapo pun yang halang. Duo insan yang asyik mengelamun tu kombang kompih hongap eh. Kok tak ado idea yang nak dibughakkan masing-masing berhayal yo monahan perasaan dalaman yang moluap-luap.  Sosokali kedongaran suasano sunyi itu diganggu oleh siulan burung tattibau, hembusan angin laut yang menderu-deru, ombak yang berdosau-dosau memukol pantai. Merpati mudo duo sejoli itu terus bercengkerama tak soda-soda deh doh yang molekat Riduan ado di kighi bahu dio oghang asyik monulih doso-doso yang dibuek eh!

Sungguhpun dah dokek duo jam Dak Ujang dan Dak Uwok duduk kek topi pantai tu masih gaso tak pueh lai. Kok bulih dio nak bosamo Dak Uwok duduk di situ sampai malam. Tompi apokan dayo. Dak Ujang dan Dak Uwok kono balik ko Tampin sobolon puko ompek. Kok tidak nanti tolopeh pulak bas last nak balik kampong. Paghah jawab eh!

 Yang mana satu yang namo eh Dak Ujang? Maco sulat kaba lamo ko?

Sampai di Tampin Dak Ujang dan Dak Uwok kono tughun kek Klinik Dr. Sulaiman kek Pulau Sebang. Kalau tughun kek bas stand takut tonampak pulak kek oghang yang kona koduo eh. Coghito tu nanti sampailah pulak kek omak ayah masing-masing.  Golo dek eh!

Semaso bojalan kek kaki limo tu Dak Ujang ajak Dak Uwok bogamba kek kodai Silver Star studio. Dak Ujang dapek moyakinkan Dak Uwok untuk bogamba ‘Walau pun kito ni masih sekolah lai Uwok oi tapi kito kono simpan gamba kito boduo untuk buek konang-konangan. Kok tak jumpo pun tak apo. Bilo nengok gambar ni nanti hilang yo gaso ghindu kito kan!’. Dak Uwok sonyum tosipu-sipu yo. Dio ngikut yolah.

Lopeh bogamba masing-masing balik. Si dagho balik ko Koto dan si bujang ko Renggoh. Dalam perjalangan pulang tu Dak Ujang bopike macam ado sontohan ajaib pulak yang dapek kek dio. Apo tidak eh, Dak Ujang heran jugak bilo topike ‘Syukur, Alhamdulillah. Kok tak ado sulat kaba lama ni mungkin tak dapek bawak Dak Uwok ko Molako!’ bisik hati Dak Ujang.

Dalam tigo haghi gamba tu pun siap. Dak Ujang simpan satu. Dak Uwok pun simpan satu. Mano lotak eh gamba tu? Dak Ujang bubuh kek colah buku dalam almari kochik tompek dio konon-konon eh bolaja dan  buek kojo sekolah. Tapi hapah pun tidak!

Lopeh makan malam Dak Ujang pun duduk kek mejo study eh. Kek omak eh memang Dak Ujang molanca buku sungguh-sungguh. Apo yang dibuek kek Dak Ujang? Dio asyik monatap gamba dio samo Dak Uwok pueh-pueh. Sobolon tido sompek dicium eh gambar tu bodosut-dosut dan lopeh tu dibubuh bawah banta dongan harapan dapeklah deh jumpo Dak Uwok dalam mimpi. Bilo bangun tiap-tiap pagi bosiap nak poi sekolah gambar tu dilotak balik kek colah buku tompek simpanan biaso.

Satu potang Dak Ujang tongah popisatan baghu bangun tido. Tibo-tibo dio todonga sogho kawan sekolah eh, si Along, mange namo eh. Dio pun poi napek an Along kek tango ghumah eh. Along liar yo mato eh mandang ko kighi ko kanan moghatikan kok ado omak atau abah Dak Ujang kek situ. Bilo dio yakin sapo pun tak ado kek situ si Along bobisik polahan kek Dak Ujang ‘Jang, gamba kau boduo dongan Dak Uwok ado topampang dalam frame kek kodai Silver Star Studio’. Bodoghau daghah Dak Ujang tibo-tibo. ‘Ah, botokoh Long’ tanyo Dak Ujang. ‘Iyo’ jawab Along sambil geleng kopalo.

Dak Ujang mulo golisah. Panik pun ado. Dio bopike macam manolah cagho eh nak mintak tokeh kodai gamba tu jangan bubuh gamba tu kek luar. Malam tu memang Dak Ujang tak dapek tido. Macam-macamlah kemungkinan yang topike dalam kopalo otak eh.

Pagi Sabtu esok eh tu Dak Ujang pun poi copek-copek ko Tampin. Konolah dio pinjam duit daghi Along untuk baya boli gamba saiz potret yang dah dilotak an dalam frame kek coghomin pameran kodai gamba tu. Si Along tu kawan sotio Dak Ujang. Along ni anak sulung. Dio yo soghang anak lolaki. Ompek yang lain sumo eh pompuan. Dio ni boduit dan anak kosayangan abah eh yang jadi Guru Besar kek Sekolah Kebangsaan Nuri.  

Bilo Dak Ujang mintak nak boli balik gamba tu tokeh Cino tu tanyo dio ‘Itu bukan lu punya bini kah?’.

Dak Ujang jawab ‘Bukan. Itu gua punya tunang la. Kita balu tunang mana bulih bubuh itu gambar depan. Nanti dio punya abang tengok bulih malah dan hantam sama gua tau.’

‘Itu macam lu baya tiga linggit lo’ kata tokeh Cino tu.

Dak Ujang tak tawa lai doh. Dio toguih baya dan solosailah satu lai bab masaalah eh.

Bokawan dongan Dak Uwok tu mongasyikan bona Dak Ujang. Sungguh pun tak lamo lai nak pekso MCE dio langsung tak highau nak baco buku. Bilo dapek bojumpo Dak Uwok giang amek-amek deh. Kok tak jumpo mati kutu. Bilo soghang-soghang Dak Ujang asyik hayal sambil mononung gamba Dak Uwok.

Homework Mathematics kek ghumah tak ponah buek. Maso bilo dio buek? Bilo sampai yo di sekolah sobolon locheng bunyi. Macam mano bulih siap? Sonang yo. Dak Ujang salin yo buku Lam See Chan. Bilo cikgu pekso sumo eh rite dan tak ado yang salah eh doh. Mr. Lee Meow Chin yang ayah eh ado kodai BATA kek pokan Pulau Sebang tu cumo sain yo dan catitkan dalam buku kojo sekolah Dak Ujang ‘Very Good’ solalu. Tompi bilo pekso ponggal atau pekso bosa Maths tak ponah pass!

Akhir eh apo jadi kek Dak Ujang oi? Pekso tokolucheh mato air pun molopeh. Gamba dio boduo dongan Dak Uwok yang totingga bawah banta tido dan tolupo nak lotakan balik kek colah buku tompek simpanan biaso tu pun dah losap. Bokolensan dio monchagik eh tapi tak yo jumpo-jumpo. Nak tanyo kek omak-abah eh tak bogani bukak mulut. Dak Ujang buek diam yolah!

Bilo tak pass pekso apo kato omak eh  ‘Nasib kaulah Jang. Payah-payah bona esok ekau mintak jadi askar yolah. Dapek yo omak alaun bulan-bulan. Kok kau nikah kawan kau pun dapek alaun. Masuklah askar Jang. Dulu omak katoan kek kau bolaja, bolaja. Ekau doge. Topulanglah kek kau Jang. Sekolah lai dah ado nyai dan pandai bogamba pulak tu. Kok tak ondak masuk askar ekau motong yo!’.

Donga sindiran omak eh tu Dak Ujang ontok yo. Sepatah haram dio tak monjawab. Dak Ujang pun tau yang gambar dio dongan Dak Uwok tu omak eh dah tojumpo dan sughukkan.

Dak Ujang naik ateh ghumah pompolahan. Sobolon poi ko dapo nak monyolongkar tudung saji sompek yo dio ninjau kek pangka tompek tido Abang Yah eh.

Bokato Dak Ujang dalam hati eh ‘Hai, sulat kaba lama banyak lagi!. Tapi apo jadah eh. Dak Uwok dah dapek kek oghang lain!’.

Nak dihombuih an ‘Sogomput Gayo’ ayat tosirat yang baghu Dak Ujang nuntut kek Puan Saebat tu kek ubun-ubun Dak Uwok tak ado poluang. Masaelah eh dio tak dapek nak ngajak Dak Uwok koluar nengok wayang kek Molako lai.

Dari kegagalan episod cinto eh dongan Dak Uwok tu dapeklah Dak Ujang meghasokan bagaimano sekso dorito  yang dialami oleh Zainuddin bilo lamaran dio untuk monikah dongan Hayati tidak ditoghimo sebagaimana yang dikesahkan dalam novel ‘Tenggelamnya Kapal van der Wijch’ karya Hamka yang sudah berulang-ulang kali dibaco oleh Dak Ujang. Malah impian Dak Ujang bilo dio mati nanti supayo kubur eh bosobolahan dongan kubur Dak Uwok pun tak mungkin terjadi.

 Dak Ujang yang kughuih kogheng macam oghang kono tibi tu mengoluh panjang ‘Sungguhpun hidup si Zainuddin dorito sekurang-kurang eh dio dapek yo disomadikan bersobolahan dongan kubur Hayati. Tompi tak apolah Uwok. Kok kau jadi jando baranak ampek sokali pun Dak Ujang sanggup ambik ekau nanti!’.

Akhirnya, Dak Ujang bernekad untuk ninggakan kampong dan merantau jauh bagi mengubek an hati dio yang terluko tu. Mungkin ado hikmah disobalik kegagalan cinto dio dongan Dak Uwok itu. Sobolon Dak Ujang poi ko Pulau Pinang, Bang Yah, yang solalu bona kono akaan kek Dak Ujang ponah nyobut kek sodagho dio ‘Mintak-mintak Dak Ujang ni jadi oghang lah!’ Wallahualam!