SULAT KABA LAMO: UJANG DAN UWOK ROMEO DAN JULIET TBS

CINTO SULAT KABA LAMA!

Karya:  Dak Ujang (GY)

“Cring! Cring! Crinnnnnnnnnnnnng” loceng sekolah pukul satu bobunyi lamo. Itu tando sesi pagi di TBS dah  tamat.  Dak Ujang toghuih molughu poi ko bolakang lab bosobolahan Balai Tunku Besar Tampin. Disitulah tompeh dio bosamo tigo ompek oghang budak-budak sesi pagi yang ado mato air budak sesi potang bojumpo sokojap. Anak-anak jantan bujang kochik macam Dak Ujang yang baghu tumbuh taji sompek iyolah monaikan syok batin dalaman sokojap sobolon menaiki bas sekolah yang dah sodia monunggu kek sobolah pintu masuk sekolah. 

Dak Ujang ko ni? Atau Ghazali Yasin? peristiwo kek Tonyamor dokek Tanjong.

Kek bolakang lab itulah tompek budak-budak momboghi atau monoghimo sughat cinto masing-masing. Itu yang jonih bogani. Kok tak ado sughat pun dapek sembang-sembang, golak kotawo dan main mato pun jadilah. Moncuit yo anak gimau masing-masing.

Ado yo kenkawan yang bocintan-cintan tak bogani nunjuk dopan-dopan. Jonih tu topaksolah guno bantuan daghi budak junior kito untuk sampaikan sughat kek awek masing-masing. Bilo jumpo bosoliseh di mano-mano tompek yang gamai di kawasan sekolah masing-masing buek dek yo, seolah-olah tak ado apo-apo hubungan antagho mereka. Itulah yang tojadi kek senior Dak Ujang yang dipangge eh Abang Kab  yang monjalin hubungan sonyap-sonyap dongan AiKay budak Padang Sebang yang ado igheh-igeh Seniwati Saadiah maso mudo-mudo dulu. Abang Kab tu pongolek dan nak jago namo sobab dio prefect. Tompi kek Dak Ujang tak dapek deh nyughok an rahsio eh doh. Sokileh ikan di air dah tau jantan botino eh. Itulah tajamnyo goghak hati Dak Ujang tu!

Bilo Dak Ujang merapati Dak Uwok kek situ toguih dio ditanyo ‘Bulih tak kito jumpo this Saturday?’

Alamak, komap bona aka pikeran Dak Ujang masa itu sobab haghi tu dah Komih. Cumo ado satu haghi sotongah yo lai nak kotiar caghi duit.

Topike kek Dak Ujang ‘bilo ado maso nak caghi duit nih. Sekughang-kughang eh sopuluh inggit mesti ado dalam tangan baghu cukup nak bawak Dak Uwok ko Molako’.

Nak heghet kek Tampin yo tak bulih. Pokan Tampin tu kochik bona. Dak Ujang takut oghang kampung atau sodagho dio dan Dak Uwok kok ado yang nampak nanti.  Lai pun kek panggung wayang Pearl dan Cathay tu gamai bona kenkawan sekolah yang nengok wayang cheap matinee haghi Sabtu. Kok tengok wayang kek situ gusak program. Kono kacau daun yo nanti.

Ponah satu kotiko dulu bilo dio tengok wayang dongan Dak Uwok kek Panggung Pearl kerusi eh kono tondang kek budak bosa yang duduk bolakang Dak Ujang. Maso tu Dak Ujang baghu nak cubo-cubo lotak  an tangan eh kek bahu Dak Uwok. Apo lai, tokojut bosa Dak Ujang dan toghuih hontok iyolah  macam tikuih jatuh ko bogheh!

Dek tak ondak nak lopehan poluang Dak Ujang pun jawab ‘Ok, good idea sweetheart. This Saturday Uwok tunggu kek bus stand Tai Lye sobolah gerai Cino songau yang jua gokok tu dalam kul 9 pagi. Uwok naik bas dulu. Bilo bas nak jalan baghu Ujang naik tau’. 

Sambil monguitkan bulu koning kek Dak Uwok Dak Ujang pun toghuih bojalan monuju kek bas Eng Giap yang sodang monunggu kek pintu bosa sekolah untuk mongangkut budak-budak yang tingga di Repah, Jeram, Air Mawang, Renggoh, Johol dan sejauh Kualo Johol.

Dalam bas 44 pasengger tu ponoh boghimpit macam sardin. Laluan tongah bas tu pun budak-budak kono bodighi. Macam-macam jonih bau. Ado yang masam. Ado yang hapak. Yang hanyir macam bau ikan haruan pun ado. Dan bilo ado yang tokontut mang ai macam tikuih mampuih bau eh. Solalu yang suko buek kojo molopeh angin busuk tu Chalat. Bilo budak maghah kek dio apo jawab eh ‘Eden yang gugi tak gaduh. Ekau yang dapek untung pulak yang heboh!’.

Sepanjang perjalanan pulang tu bas yang dinaiki bogoghak polahan yo.  Kojap-kojap bas kono boghonti bilo loceng dibunyikan untuk monughunkan budak sepanjang jalan tu. Kok Bang Kudran yang mawak bas tu elok sobab dio tak brek mongojut. Tompi kalau Bang Zakaria Sumbi Omeh yang mawak alamat bolago macam nak tosungko budak-budak yang bodighi tomasuklah budak pompuan.

Kadang-kadang tergesel punggung Dak Ujang dongan punggung budak pompuan yang samo-samo bodighi. Tompi itu sumo tak jadi hal kek dio doh. Bagi Dak Ujang walau dimano dio berado ingatan dio totap fokus kek Dak Uwok. Walaupun ado kenkawan yang ngobaan yang Dak Uwok tu tongget dan debab sikit tompi daghi kacomato Dak Ujang Dak Uwoklah gadis yang paling cantik dalam dunio ni. Dio anggap  Dak Uwok tu macam Puteri Jannatunnaim datang dari syurga! Cukup maghah Dak Ujang bilo ado budak yang ngejek dio yang Dak Uwok tu gopong dan Dak Ujang kughuih macam cicak kubin!

Bilo sampai kek ghumah lobih kughang puko duo sotongah potang Dak Ujang toguih goncang tabung buluh tompek simpan duit siling dio.  Dio cungke-cungke dapek yolah dikumpokan dalam soinggit. Itulah sado eh! Tibo-tibo poning kopalo Dak Ujang momikekan macam mano cagho eh nak nambah sombilan inggit lai!

Tongah monyuap nasi Dak Ujang topike macam-macam helah. Satu cagho, bulih mintak kek omak eh. Dak Ujang akan katokan ado kelas  tambahan haghi Sabtu. Campo duit tabung dio akan ado duo inggit. Dak Ujang kono yo caghi lapan inggit lai. Nak poi moncaghi tolo itek kek sawah dopan ghumah tu tak mungkin ado lai sobab bukan musim monuai maso tu. Tak lamo dulu bojooh Dak Ujang dapek bojua tolo itek Ochu Sinap yang solalu membuang tolo kek sawah omak Dak Ujang!

Lopeh yo makan Dak Ujang mundar mander koluar ko dalam daghi dapo ko soghambi, dagi soghambi ko dapor balik. Gelagat Dak Ujang macam oghang tak boghapo senter! Maso tu omak eh ado kek laman tongah nyomo mughan. Mongiut lantai papan ghumah eh yang jungkang jungkit tu bilo dipijak kek Dak Ujang. Omak eh ghalit yo monyolosaikan padi yang lombab tu untuk dijomo. Dio tak highau langsung kojo yang dibuek kek Dak Ujang di ateh ghumah tu doh.

Tibo-tibo todotik hati Dak Ujang nak ninjau bilik Abang Yah kek pangka ghumah. Abang Yah guru lepasan SITC Tanjung Malim yang baghu mongajar duo tahun kek Sekolah Datuk Undang Kamat di Ulu Nuri tak ado ghumah maso tu. Dio ado di sekolah molatih pasukan bolasepak untuk masuk pertandingan akhir  antagho sekolah-sekolah peringkat Kuala Pilah. Dalam hati Dak Ujang ‘Eloklah ekau tak ado kek ghumah ngang. Kok ado susah yo den nak buek kojo!’.

Masuk-masuk yo kek pangka ghumah tu toboliak bosa biji mato Dak Ujang. Dio tonampak sulat kaba lama botimbun kek sudut tiang sobolah mejo study Abang Yah. Kopalo Dak Ujang yang lonjong macam buah kana tu toguih ghengan. Tak ado lai gaso kusut masai doh.

‘Wah, ini sulat kaba lama banyak bagus. Thank you very very much Bang Yah oi. You have saved my life lah!’ bisik hati Dak Ujang.

Bilo dapek joki topijak tu, Dak Ujang pun tak lengah-lengah lai doh. Dio toghuih koluarkan timbunan sulat kaba lama tu dan diikek kuek-kuek. Mongengkeh dio monaikan sulat kaba tu ateh bosika nak poi jua kek kodai Haji Suman. Hai, logo, logo boto-boto kopalo Dak Ujang. Duit yang dicaghi-caghi tu dah gerenti dapek. ‘Botuah kau Dak  Uwok. Sulat kaba ni joki kito. Bang Yah, you are marvelous, marvelous. Thank you brader for ‘langganing’ the newspaper!’.

Sambil mongayuh basikal ko kodai Dak Ujang bodendang-dendang macam oghang mabuk. Dio topokek tololong monyanyi lagu ‘Termenong’ nyanyian Jeffidin yang monjadi siulan anak mudo maso tu. Sapo yo yang dio jumpo habis ditogo eh. Dak Ujang ni memang poghamah budak eh dan dio suko amek-amek bokawan dongan oghang tuo-tuo. Antagho kawan baik dio kek kampong tu Pak Cik Yatim Molaya, Abang Aziz Montegheh, Bang Mansor Yankee dan Pak Cik Bachik Bulin.  Boghompek tu solalu main dam dongan Dak Ujang kek kodai Suboh lopeh dio balik sekolah. Kek Renggoh tu tak ado sapo yang dapek mongalahkan Dak Ujang. Bojooh boto Dak Ujang solalu dapek makan bolanjo dio oghang.

Bilo sampai kek kaki Bukit Pulai yang tinggi togak sobolah kobon gotah cino Ling Kong, ayah kawan sekolah se Lau Kin Kah yang duduk kek pokan Air Mawang tu, Dak Ujang topaksolah tughun. Monchungap-cungap deh monolak bosika sambil monyanyi-nyanyi lagu ‘Bulan dan Juga Angin’ pulak. Lagu nyanyian P. Ramlee dan Normadiah tu memang kogomaan Dak Ujang. Senikato lagu tu sungguh bermakno. Bilo dinyanyikan dongan penuh perasaan Dak Ujang togaso seolah-olah dio dapek menyampaikan gaso ghindu eh kek Dak Uwok melalui angin yang lalu!

Asrama TBS

Tibo-tibo tokojut bosa Dak Ujang bilo Tok Dukun Wahab Kocopong koluar susuk sasau daghi somak kek topi jalan tu. Mungkin dio tughun daghi ateh bukit tu moncaghi ughek  kayu untuk dijual. Tok Dukun botanyo ‘Wah, banyak surat kobar ekau bawak ni Jang?’.  

Jawab Dak Ujang ‘Ado yo sikit Tok Dukun. Bang Yah se sughoh jua ni’.

Tok Dukun Wahab Kocopong yang tokona hebat dongan ilmu firasatnyo tu sonyum yo deh bilo nonga jawapan daghi Dak Ujang tu. Agak eh dio tau yang Dak Ujang dah pomongak an dio!

Sampai kek kodai Haji Suman sulat kaba tu ditimbang. Bulih tahan yo boghek eh. Dio kono guno ponimbang yang bosa. Alat ponimbang kochik tak naik mato daching tu doh.  Haji Suman kigho dongan sompua eh dan boghitau ‘Sumo eh lapan inggit limo puluh sen Jang’.

Dak Ujang tak cakap apo-apo. Tosengeh yo deh bilo toghimo duit banyak tu.  Yang sen-sen eh tu  dapeklah Dak Ujang boli gulo kicap, minam sobotol air sarsi Long Chan dan makan kueh sokoping kek kodai Suboh yang tolotak sobolah pokok kuwinin bosa kek simpang jalan Renggoh botontangan dongan jalan nak poi ko Kampung Payo tu.

Bilo Dak Ujang kayoh basikal maso balik ghumah dio topike ‘dapek lapan inggit kono bagi duo - dapek ompek inggit soghang.  Ompek inggit campo duo inggit yang ado masih lai 

kughang ompek inggit nak bagi cukup sopuluh inggit!’.

Bilo sampai ghumah Dak Ujang pun kono susun kotiar baghu. Dio pike elok diboghosihkan bilik Bang Yah  dan seterika sekali baju dan soluar Bang Yah yang bolon bolipek lai tu. Mintak-mintak kang bilo dio tengok bilik eh boghosih dan baju soluar dio dah bogosok Dak Ujang pike takkanlah dio nak ambik ompek inggit bahagian dio tu doh!

Osah, jerangkap samar Dak Ujang mongono. Bilo Abang Yah balik tengok bilik eh bogosih dan baju eh dah elok bogosok Bang Yah nampak sonyum giang. Dio boghi Dak Ujang ompek inggit . Sambil mongambek duit tu Dak Ujang golak dalam hati eh ‘haghi ini kau kono lai kek den Yah oi. Nasib kau lah!’.

Bilo dah dapek ompek inggit tu Dak Ujang kobaan kek Bang Yah yang surat kaba eh dah dijual. Dio pun acah-acah hulurkan duit tu kek Bang Yah yang luguih bondo bona-bona. Apo jawab Bang Yah ‘ambiklah kek kau Jang’.  Dak Ujang jawab ‘Mokasihlah Bang Yah’. 

Sambil koluar daghi pangka ghumah tu Dak Ujang tosengeh dan dalam hati eh mongoletek togolak soghang-soghang sambil bokato pompolahan ‘Osah, cikgu sokolah ni bangang yo gupo eh. Sonang yo den ngakaan ekau!’.Waduh! Handa kau Dak Ujang.

 TBS hari ini. Agak eh waktu adegan sulat kaba lama dulu gimanolah TBS?

Pagi esok tu dio koluar ghumah pakai unifom sekolah – baju putih soluar putih. Sampai di Tampin Dak Ujang kono tukar pakaian. Mano tukar baju dan soluar? Kek tandas busuk bas stand Tampin. Mano simpan baju dan soluar tu? Kek kodai buku Mustafa. Itulah satu-satunya  kodai buku oghang Melayu di Tampin bosompadanan pokan Pulau Sebang.  

Bilo solosai tukar pakaian Dak Ujang pun bagi signal mintak Dak Uwok naik bas Tai Lye yang nak botolak ko Molako. Dak Uwok duduk kek tongah-tongah bas. Bilo bas bogoghak yo Dak Ujang pun naik bas dan toghuih duduk bolakang sokali. Bilo Dak Ujang dah yakin tak ado oghang yang dio kona ado dalam bas tu baghulah dio poi duduk sobolah Dak Uwok.

Kok bas tu belok ko kighi dio botahan koghehkan bodan eh. Bahu Dak Uwok pun monghimpit bahu Dak Ujang. Bilo bas belok ko kanan Dak Ujang lopehan bodan eh pulak sampai toghasak bodan Dak Uwok yang montok tu kek dinding bas. Kok Dak Uwok botanyo sesuatu kek Dak Ujang, kok dio donga pun dio buek tak donga dan mintak ulang balik ‘I beg your pardon. I can’t hear you!’. Camtulah gagam anak bujang yang ibarat ayam jantan baghu bolaja bokokok dan solemo pun baghu kogheng tu.  Lupo deh yang dio tu masih bujang sunti lai. Dio ingat dio dah bosa panjang.   

Sampai kek bas stand Molako tak ado gisau hati Dak Ujang doh. Apo tidak eh, bawak Dak Uwok duit dalam poket ado ompek boleh inggit – tomasuk singgit yang dapek yo dio kechek kek omak eh. Bukan sajo dapek makan nasi sodap, Dak Ujang bawak Dak Uwok nengok wayang sambil makan kuci. Lopeh tu sompek makan air batu bandung dan poi duduk lepak-lepak kojap kek pantai Bandar Hilir.

Kek bangku bosi tompek koduo anak bujang dan dagho sunti tu duduk tak ado sapo pun yang halang. Duo insan yang asyik mengelamun tu kombang kompih hongap eh. Kok tak ado idea yang nak dibughakkan masing-masing berhayal yo monahan perasaan dalaman yang moluap-luap.  Sosokali kedongaran suasano sunyi itu diganggu oleh siulan burung tattibau, hembusan angin laut yang menderu-deru, ombak yang berdosau-dosau memukol pantai. Merpati mudo duo sejoli itu terus bercengkerama tak soda-soda deh doh yang molekat Riduan ado di kighi bahu dio oghang asyik monulih doso-doso yang dibuek eh!

Sungguhpun dah dokek duo jam Dak Ujang dan Dak Uwok duduk kek topi pantai tu masih gaso tak pueh lai. Kok bulih dio nak bosamo Dak Uwok duduk di situ sampai malam. Tompi apokan dayo. Dak Ujang dan Dak Uwok kono balik ko Tampin sobolon puko ompek. Kok tidak nanti tolopeh pulak bas last nak balik kampong. Paghah jawab eh!

 Yang mana satu yang namo eh Dak Ujang? Maco sulat kaba lamo ko?

Sampai di Tampin Dak Ujang dan Dak Uwok kono tughun kek Klinik Dr. Sulaiman kek Pulau Sebang. Kalau tughun kek bas stand takut tonampak pulak kek oghang yang kona koduo eh. Coghito tu nanti sampailah pulak kek omak ayah masing-masing.  Golo dek eh!

Semaso bojalan kek kaki limo tu Dak Ujang ajak Dak Uwok bogamba kek kodai Silver Star studio. Dak Ujang dapek moyakinkan Dak Uwok untuk bogamba ‘Walau pun kito ni masih sekolah lai Uwok oi tapi kito kono simpan gamba kito boduo untuk buek konang-konangan. Kok tak jumpo pun tak apo. Bilo nengok gambar ni nanti hilang yo gaso ghindu kito kan!’. Dak Uwok sonyum tosipu-sipu yo. Dio ngikut yolah.

Lopeh bogamba masing-masing balik. Si dagho balik ko Koto dan si bujang ko Renggoh. Dalam perjalangan pulang tu Dak Ujang bopike macam ado sontohan ajaib pulak yang dapek kek dio. Apo tidak eh, Dak Ujang heran jugak bilo topike ‘Syukur, Alhamdulillah. Kok tak ado sulat kaba lama ni mungkin tak dapek bawak Dak Uwok ko Molako!’ bisik hati Dak Ujang.

Dalam tigo haghi gamba tu pun siap. Dak Ujang simpan satu. Dak Uwok pun simpan satu. Mano lotak eh gamba tu? Dak Ujang bubuh kek colah buku dalam almari kochik tompek dio konon-konon eh bolaja dan  buek kojo sekolah. Tapi hapah pun tidak!

Lopeh makan malam Dak Ujang pun duduk kek mejo study eh. Kek omak eh memang Dak Ujang molanca buku sungguh-sungguh. Apo yang dibuek kek Dak Ujang? Dio asyik monatap gamba dio samo Dak Uwok pueh-pueh. Sobolon tido sompek dicium eh gambar tu bodosut-dosut dan lopeh tu dibubuh bawah banta dongan harapan dapeklah deh jumpo Dak Uwok dalam mimpi. Bilo bangun tiap-tiap pagi bosiap nak poi sekolah gambar tu dilotak balik kek colah buku tompek simpanan biaso.

Satu potang Dak Ujang tongah popisatan baghu bangun tido. Tibo-tibo dio todonga sogho kawan sekolah eh, si Along, mange namo eh. Dio pun poi napek an Along kek tango ghumah eh. Along liar yo mato eh mandang ko kighi ko kanan moghatikan kok ado omak atau abah Dak Ujang kek situ. Bilo dio yakin sapo pun tak ado kek situ si Along bobisik polahan kek Dak Ujang ‘Jang, gamba kau boduo dongan Dak Uwok ado topampang dalam frame kek kodai Silver Star Studio’. Bodoghau daghah Dak Ujang tibo-tibo. ‘Ah, botokoh Long’ tanyo Dak Ujang. ‘Iyo’ jawab Along sambil geleng kopalo.

Dak Ujang mulo golisah. Panik pun ado. Dio bopike macam manolah cagho eh nak mintak tokeh kodai gamba tu jangan bubuh gamba tu kek luar. Malam tu memang Dak Ujang tak dapek tido. Macam-macamlah kemungkinan yang topike dalam kopalo otak eh.

Pagi Sabtu esok eh tu Dak Ujang pun poi copek-copek ko Tampin. Konolah dio pinjam duit daghi Along untuk baya boli gamba saiz potret yang dah dilotak an dalam frame kek coghomin pameran kodai gamba tu. Si Along tu kawan sotio Dak Ujang. Along ni anak sulung. Dio yo soghang anak lolaki. Ompek yang lain sumo eh pompuan. Dio ni boduit dan anak kosayangan abah eh yang jadi Guru Besar kek Sekolah Kebangsaan Nuri.  

Bilo Dak Ujang mintak nak boli balik gamba tu tokeh Cino tu tanyo dio ‘Itu bukan lu punya bini kah?’.

Dak Ujang jawab ‘Bukan. Itu gua punya tunang la. Kita balu tunang mana bulih bubuh itu gambar depan. Nanti dio punya abang tengok bulih malah dan hantam sama gua tau.’

‘Itu macam lu baya tiga linggit lo’ kata tokeh Cino tu.

Dak Ujang tak tawa lai doh. Dio toguih baya dan solosailah satu lai bab masaalah eh.

Bokawan dongan Dak Uwok tu mongasyikan bona Dak Ujang. Sungguh pun tak lamo lai nak pekso MCE dio langsung tak highau nak baco buku. Bilo dapek bojumpo Dak Uwok giang amek-amek deh. Kok tak jumpo mati kutu. Bilo soghang-soghang Dak Ujang asyik hayal sambil mononung gamba Dak Uwok.

Homework Mathematics kek ghumah tak ponah buek. Maso bilo dio buek? Bilo sampai yo di sekolah sobolon locheng bunyi. Macam mano bulih siap? Sonang yo. Dak Ujang salin yo buku Lam See Chan. Bilo cikgu pekso sumo eh rite dan tak ado yang salah eh doh. Mr. Lee Meow Chin yang ayah eh ado kodai BATA kek pokan Pulau Sebang tu cumo sain yo dan catitkan dalam buku kojo sekolah Dak Ujang ‘Very Good’ solalu. Tompi bilo pekso ponggal atau pekso bosa Maths tak ponah pass!

Akhir eh apo jadi kek Dak Ujang oi? Pekso tokolucheh mato air pun molopeh. Gamba dio boduo dongan Dak Uwok yang totingga bawah banta tido dan tolupo nak lotakan balik kek colah buku tompek simpanan biaso tu pun dah losap. Bokolensan dio monchagik eh tapi tak yo jumpo-jumpo. Nak tanyo kek omak-abah eh tak bogani bukak mulut. Dak Ujang buek diam yolah!

Bilo tak pass pekso apo kato omak eh  ‘Nasib kaulah Jang. Payah-payah bona esok ekau mintak jadi askar yolah. Dapek yo omak alaun bulan-bulan. Kok kau nikah kawan kau pun dapek alaun. Masuklah askar Jang. Dulu omak katoan kek kau bolaja, bolaja. Ekau doge. Topulanglah kek kau Jang. Sekolah lai dah ado nyai dan pandai bogamba pulak tu. Kok tak ondak masuk askar ekau motong yo!’.

Donga sindiran omak eh tu Dak Ujang ontok yo. Sepatah haram dio tak monjawab. Dak Ujang pun tau yang gambar dio dongan Dak Uwok tu omak eh dah tojumpo dan sughukkan.

Dak Ujang naik ateh ghumah pompolahan. Sobolon poi ko dapo nak monyolongkar tudung saji sompek yo dio ninjau kek pangka tompek tido Abang Yah eh.

Bokato Dak Ujang dalam hati eh ‘Hai, sulat kaba lama banyak lagi!. Tapi apo jadah eh. Dak Uwok dah dapek kek oghang lain!’.

Nak dihombuih an ‘Sogomput Gayo’ ayat tosirat yang baghu Dak Ujang nuntut kek Puan Saebat tu kek ubun-ubun Dak Uwok tak ado poluang. Masaelah eh dio tak dapek nak ngajak Dak Uwok koluar nengok wayang kek Molako lai.

Dari kegagalan episod cinto eh dongan Dak Uwok tu dapeklah Dak Ujang meghasokan bagaimano sekso dorito  yang dialami oleh Zainuddin bilo lamaran dio untuk monikah dongan Hayati tidak ditoghimo sebagaimana yang dikesahkan dalam novel ‘Tenggelamnya Kapal van der Wijch’ karya Hamka yang sudah berulang-ulang kali dibaco oleh Dak Ujang. Malah impian Dak Ujang bilo dio mati nanti supayo kubur eh bosobolahan dongan kubur Dak Uwok pun tak mungkin terjadi.

 Dak Ujang yang kughuih kogheng macam oghang kono tibi tu mengoluh panjang ‘Sungguhpun hidup si Zainuddin dorito sekurang-kurang eh dio dapek yo disomadikan bersobolahan dongan kubur Hayati. Tompi tak apolah Uwok. Kok kau jadi jando baranak ampek sokali pun Dak Ujang sanggup ambik ekau nanti!’.

Akhirnya, Dak Ujang bernekad untuk ninggakan kampong dan merantau jauh bagi mengubek an hati dio yang terluko tu. Mungkin ado hikmah disobalik kegagalan cinto dio dongan Dak Uwok itu. Sobolon Dak Ujang poi ko Pulau Pinang, Bang Yah, yang solalu bona kono akaan kek Dak Ujang ponah nyobut kek sodagho dio ‘Mintak-mintak Dak Ujang ni jadi oghang lah!’ Wallahualam!

PUISI MOHAMED SALLEH JOHARI: HARI ITU...HARI INI...

MOHD. SALLEH JOHARI

Hari itu .... Hari ini....

Karya: Mohamed Salleh bin Johari  (Bec 66)

Hari itu aku mengenali alam nyata

Aku datang dengan tangan menggengam erat rahsia ilahi

Aduh aku hanya insan biasa

Rahsia yang kugenggam terurai

Aku menangis, aku menangis, aku menangis

Hanya ibu, ayah, keluarga menjagaku

Aku dimanja, disayangi

Bermulalah kisahku di alam nyata

Bertahun lamanya aku diasuh

Hingga aku dapat berkelana

Dari Rembau, Chow Kit Rd. hingga ke penghujung dunia

Berketuntang, lintang-pukang aku lalui hidup

Hike along, hike along

All day long hike  along

To the end of the wide wide world

Hike along, hike along

Itulah nyanyian pengakap yang ku nyanyikan sepanjang perjalananku 

dariRembau hingga penghujung dunia

Hari ini aku sudah sampai ke penghujung dunia

Gunungku Rembau sudah jauh dari ku

Tiada lagi kudengar laungan ungka mendayu-dayu

Hanya kudengar hiruk-pikuk kawan-kawan bersembang dalam fb

Aku dengar detik-detik jantung

Allah hu Akbar, Allah hu Akbar, Allah hu Akbar

La illa ha illah

Hari ini kukenal diriku 

Kugenggam erat rahsia yang telah terurai.

Puncak Gunung Dato' yang berbatu.

SEMBANG DUO ANAK JOHOL TENTANG POMBONGOK, OMPONG DAN KAKI BANGKU

Ghazali Yassin dengan ayam kesayangannya.

Md Arif Ab Samad:  Cikgu Abu Aman ni rupenye kenal/masih ingat akan arwah abang saya Hamdan Abd Samad. Saya hanye mampu mendoakan kesahteraan ke atas roh dia dan juga arwah abang saya, amin!.

Zahriman Alias:  Hensem lagi cikgu se ni...

Ghazali Yasin:  Yo, abang kito ni memang hensem dan pandai pulak tu. Diolah anak Johol yang potamo dapek Gred 1 (dulu ada dua - 1 SC dan 1 sijil lagi FMC). Kalau poi rumah abang kito ni dulu dio tak ado kojo lain - baco buku yo. Dio ni tak tau compogho, lastik bughong pun tak pandai doh!

Zahriman Alias:  Dah kalau tak ghoti compogho, lastik burong tu, kito kek kampong pangge an ompong yo........ sori cikgu, tosalah pangge, ado ko senior dipangge ompong ..... hehehe!

Abu Aman Bachik:  Pombongak beboto dak Zali ni. Adokoh ese dikobaannyo tak tau compogho dan lastik burung.  Buek sangka tokotek pun se tau.

Zahriman Alias:  Konon eh dio nak jek cikgu tu ..... dikobakannyolah cikgu ni kuek maco buku yo ...... apo dah salah koba, bunyi  macam cikgu ni budak ompong yo pulak ..... hahaha!

Abu Aman Bachik: Adolah ese dikobaannyo kuek maco buku. Ese maco buku 10 tahun tak habih sobuah. Kok se rajin maco buku maghin mang se kelulusan Ph.D.  Tak do jadi Cikgu cabuk do. Zali zali, nak Jekyll buek apo ngabihan bogheh yo!.

Abu Aman Bachik:  Mang ompong pun Iman.

Zahriman Alias:  Se pulak kaki bangku .... sojak dari sekolah dulu tak ghoti main bola.....nengok bola pun tak suko.....sampailah nijam.

Ghazali Yasin: Lazimnyo tin ponoh macam Bang Abu ni tak ngaku dio handa doh! Ese taulah maso kocik-kochik dulu ese moncokah kek Air Mawang tu yo - asyik main dam, compongho kek Jeram, lastik burung dengan kawan-kawan. Ese tak ponah jumpo Bang Abu kek sungai, kek padang main bola pun tak ado. Kalau poi ghumah Bang Abu, dio sambil monyarap pun bulih maco buku. Kok tak cayo tanyo akak se. Tontang tak sampai peringkat Ph.D tu bukan sobab tak pandai tapi tumpuan kek keluarga yang menghalangnya. Ghamai kawan yang bangang dari den pun ada Ph.D (dio handa dalam bidang dio yo - kaji biji tembikai hebat!, yg lain mungkin lobih bangang dari kito!)

Ahmad Fadzil Yassin:  Sobot tontang coghito bangang dan kaki bangku ini toingat ese maso kek SMC1 kek sokolah TBS dulu (waktu itu namo eh Government Primary School Tampin). Ese kono main bola, buek potama kali lak tu. Ese konon eh jaga bek, tompi solama sotongah jam main, ese koliling padang ngoja bola, mano nak jago kawasan bek, tongah, sampai bolaghi ko hujong gol. Lopeh sotongah jam jadi hongeh, tokoneneng ponek, kadang-kaadang sampai tosadai topi lain padang. Abih yo main masuk polawanan koduo namo ese tak dimasukkan laie dalam tim. Apo komen guru ese lopeh itu. Ghajin amek-amek kete. Boleh rehatlah sampai bilo-bilo. Sampai nijam ese dah rehat dan pencen main bola. Itu tahun 1955 laie...Joghan ese tengok bola ini. Memang jaghang amek-amek. Baik ese maco buku atau surat khabar lamo.

Abu Aman Bachik tiba di rumah Salleh Simon dalam satu pertemuan Grup TBSST.

Ghazali Yasin:  Salam Bang AFY! Lazim eh, dari pemerhatian ese sojak dari sokolah dulu orang yang 'desk legs' (takut ese nak nyobut dalam Bahasa Malaysia!) ni adalah orang yang ulek buku, yang coghodik bona-bona. Bilo dio sepak bola tu dobush yo! Lopeh main kaki eh bongkak bongkek. Agak eh abang-abang, kawan-kawan dan adik-adik yang outstanding in life tu biaso eh jonih nilah deh. Jaghang bona Profesor, Dr. Drs atau lain-lain title ni yang hebat dalam sukan - mungkin soghang duo macam Prof. Khoo Kay Kim dan Dr. M.  Jegathesan. Nampak eh AFY ni samo yo deh macam species ni!

Abu Aman Bachik:  Sudah lah kau Li, usah nak bodeklah. Ese mang kan pandai pun. Cumo acah acah yo.

Abu Aman Bachik:  Yo koh tu Iman. Tak tau den tu doh. Oh, itulah sobab eh jadi speter pun speter 13 Mei yo. Ingat den Iman mestilah hebat bersukan eh mako layak jadi speter.

Abu Aman Bachik:  Man ompong pun. Acah yo lobeh.

Ghazali Yasin:  Bang Abu dan Bang AFY, maso sekolah dulu kita junior suko perhati 'dahan' yg ateh (senior). Kito suko ambik tau tentang diri tokoh-tokoh  pelajar seperti School  Captain, Vice-School Captain dan prefect kito serta rakan-rakan yang outstanding dalam bidang akademik. Kito pun banggo mendekati jaguh-jaguh sukan sekolah. Pendek kato pelajar-pelajar dalam duo  ketogori ini ibarat ikan-ikan dalam aquarium - ramai peminat yang sentiaso memerhati!. Jadi ese potahankan apo yang ese cakap – katolah sikit - 'mokasih Li!'!

Ahmadfadzil Yassin:  GY, sobona eh ese ini duo-duo tak pandai pon. Main bola macam padang tu ese yang punyo soghang, tak ikut aturan lalu di'pencenkan’ lopeh sokali main maso kek SMC 2 tahun 1956. Walaupun School Vice-Captain pada tahun 1962 tompi sukan-sukan lain langsung tak ponugheh. Masih ese ingat waktu Sports Day tahun 1962, ese Sulaiman House Captain. Biaso eh captain dapek hadiah tompi ese uceh tak ado satu pon hadiah yang ese toghimo, Jadi kojo ese bawak kawad bondero jolah. Dalam akademik pon ese hampir lonco, nasib baik dapek Gred 3. Itu sobab eh ese kojo kek Kilang Bonang kek Tampoi, Johor Bharu, lopeh abih School Certificate tahun 1962. Jadi tak ado pandai eh ese doh, maco pulak maleh nabona. Tak sangko pulak ado junior macam GY ini mandang ateh bona kek ese dan AAB. Memanglah kito ada donga ado yang suko kek kito boduo, baik lolaki mahupun pompuan. Tompi tak tahu sapo. Itulah bilo GY sobot yang junior mandang ko senior itu bosa pulak ghaso hati ese. Sobona eh kito ini ompong jo. Tak tahulah AAB. Bak kato oghang sokagahang ogah jo yang lobih.

Ghazali Yasin:  Ese terpaksa respond kepada AFY sebab ese tidak mahu dia meraso  terlalu rendah diri. Sepatutnya kedudukan AFY perlu diletakkan dipersada yg tinggi, bersama dengan beberapa tokoh bekas pelajar TBS lain yang nama mereka begitu terkenal di peringkat nasional. Sebagai pemimpin pelajar (Vice School Captain 1962) kedudukan AFY ibarat sebatang pohon yang tinggi, boleh dilihat dari mana-mana posisi, sudah semestinya menjadi tumpuan ramai, terutama dari kalangan pelajar Melayu kontemporari ketika itu. Begitu juga AAB. Bagi ese, AAB dan AFY, duo tokoh cemerlang produk dari TBS dalam era 60an. Walaupun sudah meninggalkan alma-mater begitu lama namun nama abang bodua ini cukup mudah diingati oleh bekas pelajar seangkatan (termasuk 4,5 tahun yg lebih junior). AAB, anak Melayu potamo dari Johol memperolehi Gred I dan satu-satunya anak Johol yang pernah dilantik sebagai School Captain (lepas itu tidak ada lai). AAB, anak Johol pertama dipilih mengikuti latihan perguruan di sebuah kolej elit di Brinsford Lodge, England. Selepas itu AAB menjadi guru, berjaya menghasilkan ramai murid cemerlang. Bukan AAB tidak mampu meneruskan pengajian ke peringkat yg lebih tinggi (sehingga Ph.D) tetapi sebagaimana yang umum mengetahui bahawa AAB menghadapi pelbagai constraints dalam hidupnya. Manakala AFY pula, memang ramai yang tahu bahawa dia tenggelam selepas menamatkan Form V, tetapi mengejutkan ramai kawan dengan kemunculan beliau beberapa tahun selepas itu dengan nama yang lebih gagah sebagai penyumbang penulisan kesusasteraan bermutu, boleh kita letakkan sebaris dengan kelompok sasterawan terbilang tanahair. AFY juga begitu berjaya dalam kerjayanya di Penerbit Fajar Bakti. Saya mahu tegaskan secara jujurnya bahawa saya bukan mahu mengampu, tetapi respect sepatutnya diberikan kepada duo tokoh pemimpin pelajar Melayu era 60an ini. Kita faham, AAB dan AFY rasa segan untuk mengakui kecemerlangan diri sendiri. Sesunggungnya mereka berdua adalah permata nilam TBS. Tahniah!

Tn Presiden Grup, Zahriman Alias di satu jamuan.

Zahriman Alias:  GY ekau pun handa ..... caro penulisan kau ni pun menunjukkan otak kau sangat bernas. Den pasti kalau kau coret konangan-konangan lamo kau maso sekolah dulu dan kau uboh kek column TBSST ni, kan sodap kito sumo maco. Den raso orang macam kau nilah yang kito tunggu-tunggu selamo ni untuk menulis cerito-cerito lamo seperti yang diharap-harapkan oleh AFY ...... cubolah warigh ..... bueklah ..... doghehlah ..... bilo kau dah mulokan satu-satu kisah tu nanti mako ghamailah kawan lain yang akan tompang sekaki dan menyampok-nyampok ..... inilah kemesraan yang kito cari-cari dalam TBSST.

Zahriman Alias: Esei beraso sangat gembiro dan terujo bilo budak GY ni, at last bukak akaun fb dan join TBSST...... Sojak dio masuk ni TBSST dah mulo bersinar balik ..... .kok tak tu makin ari makin malap yo. Syabasss Ghazali Yasin .... keep up the good work. Jom kito ceriokan balik TBSST dan TAMPANG ni........
Nasa Abu Bakar: Yang den faham GY ni maso sekolah dulu memang pelawak orangnyo ... ramai yang suko kat dio sebab lawaknyo tu dan secara tak langsung ramai kawan-kawannyo .... dan satu laei dio ado kakak yang cun, Sharifah namo nyo yang kahwin dengan Hamzah Head Prefect TBS.. Den pun dah tak ponah jumpo Sharifah ni .... dulu maso sekolah ado juga minat sikit-sikit  kat dio tapi ketiko itu den hanya Prefect biaso ajo dah tentu Hamzah jadi pilihan dio sebab Headboy katokan.... hehehe. Itu cerito lamo den ... bukak siki-sikit kisah lamo-lamo  percintaan den. GY tahu cite den ni .... the last I met him was at USM Penang semasa graduation of my  Ericsson students kat sano. Den kono poi graduation tu mewakili Ericsson Malaysia. That was the last time I heard of him until few days ago he called me ..... seronok nya bercakap dengan  dio.... Manolah dio dapek no HP den tu ...
 

Nasa Abu Bakar: GY,  kau suruh kakak kau atau ajar dio buka akaun FB dapek kami semua cite-cite kisah lamo-lamo sebagai mengenang cite-cite maso di TBS ...

Ahmad Fadzil Yassin: Mokasih GY, puji sangat tu hinggo moleleh lak air mato ese tontang citer ese maso kek TBS dulu. Soghang duo itu adolah ese donga tompi tak adolah sohebat GY ini. Kadang-kadang tofikir pulak macam tak pocayo bona ghaso eh. Namun yolah mungkin GY, sobagai budak junior kek TBS ado mompunyai porasaan bogitu. Jadi ese ini ambik benefit of a doubt jolah. Sobona eh bilo tahu result School Cetificate ese hampir sononggeng dan pulak dalam sukan ado yang perli ese sambil kato house captain apo ini, tak dapek trofi apo pun ese ghaso lomah tulang-tulang ese, mahu ghaso eh nak monangis waktu itu. Jobo eh bukanlah main-main. GY tahu bilo ese mulo kojo kek kilang bonang tu air mato moleleh abih sobab kojo ese ngutip skru, paku dan nyapu lantai. Lamo ese kojo macam tu, ghupo-ghupo eh oghang Jepon ini macam tu kojo eh kek Jepon sanun. Kato dio nak bojayo dalam kojayo kono bolaja dari bawah, misti tahu cagho nyapu sampah, tahu cagho mogang ponyapu, tahu cagho kutip paku dan sekru. Bilo masuk kojo pakaian ese boghosih, abih kojo pukul limo potang, baju ese koto bominyak, kono minyak grease, rambut ese momutih, bukan koghano uban tompi dilipoti debu kapeh. Ado yang kato rambut ese ini putih hitam pada pagi dan putih maso potang. Kaghang ini bilo mikir tontang pongalaman ese tu sosokali air mato koluar gak. Mokasihlah pujian yang GY boghian itu.Tokodu, tosodu dan tohaghu.

Hattar Othman

Abu Aman Bachik: Ese baru balik dari cabuk tunggo gigi. Oh mak ai sakit eh. Tapi bilo maco Zali muji kito melangit langit ni AFY nak yo nyawab eh. Dah lah puji orang melangit langit, lopeh mintak ucapan timo kasih lak ti. Beboto buek malu oghang Mawang Johol yo kau lah Li. Dah puji dah lah. Nak minta timo kaseh moh pulak. Nampak bebona tak ikhlas eh orang  Johol ni. AFY, kato tak dapek aktip duo tiga hari ini. Ese tengok ado jo! Lon stat lai koh?
Ahmad Fadzil Yassin:  Lon mulo lailah AAB. Ado jo hal eh. Dah mulo boboghapo haghi lalu nak nyiapkan tugas PAPTI, grup alumni bokeh polajar Malaysia di Indonesia itu. Dio oghang minta ese nulih limo bab. Riset dah ado nak nulih eh bukan kopalang maleh eh. Bilo nak mulo ado yo hal pulak. Kali ini dah duo kali poi sopita Solayang nengok sopupu isteri ese di wad. Sopupu isteri ese, Wahab ayah pado ponyanyi Waheeda sakit bongkak hati, dah sotongah hati eh tak leh pakai laie. Kata doktor ado kotumbuhan pulak tu. Ese tengok dio sodih boto. Hibo ese nengok eh.

Abu Aman Bachik: Doa lah bebanyak. Dan zikirlah bebanyak. Itu yo lah sumbangan yang boleh kito boghi AFY. Mudah-mudahan Allah ringankan penderitaannya. Insya’Allah!

Ahmad Fadzil Yassin : Sopupu ese itu dinasihatkan buek kimoterapi kek ghumah. Lopeh duo minggu doktor akan cek somulo dan tengoklah lak apo yang patut dibuek. Mudah-mudahan akan ado kosan eh. Insya-Allah!

Ghazali Yasin: Maaf, baru balik konduri. Konduri kek kampong ni, pagi kono poi tolong siang daging, dijamu minam dengan  kueh mueh tradisional, tomasuklah pulut samba tumih. Lopeh tu kito samo tolong masak. Yang tak pogang sonduk dan pongacau tu duduklah bobughak tak ikut agenda sehinggalah time makan. Dah lopeh pengantin datang tu baghulah molek kito balik ghumah. Kalau orang yang pemikiran kreatif, tomasuklah yang sentiaso nak maco apo yg dapek yo kojo eh poi konduri di kampong ni membosankan - tambah pulak cuti sekolah ni - tiap minggu ado yo yang buek konduri (kawin, aqiqah, masuk jawi, doa selamat dan arwah). Yang tak sodap eh tu, anak-anak sumo duduk jauh (Seremban, Kolumpo dan lain-lain tompek) tompi nak buek konduri sumo balik kampung! Omak ayah eh tak ado masaelah. Kadang-kadang anak monantu eh tak taulah deh nak nogo kito doh. Apo nak buek an - ini budayo budak mudo sokarang. Mano silap eh tu? Masa kito dulu yang mudo sapo yang tuo dari kito. Nijam kok kito tak nogo hai buek tak kona yo deh. Tapi ado yo soghang duo yang macam kito dulu. Lopeh ni ese nak poi Tampin kek Giant pulak - banyak baghang dapo yang tak ada. Insya'Allah, malam ni ese cubo jawab komen ZA, AAB dan AFY - lopeh donga baco kitab kek surau. Wassalam!

Ghazali Yasin: ZA, kau jangan nak jobot-jobot an ese pulak. Tibo-tibo sogham sojok ghaso bodan. Ese tak ghoti nak tulih macam orang sastera. Bahaso ese bahaso NGO – ringkas dan kogheh sikit. Nantilah bilo ado kolapangan ese cubo buek coghito lawak sikit.
 

Ghazali Yasin: AAB Ese cumo mintak mokasih yo Bang Abu. Biaso eh kalau tulis biografi tokoh-tokoh terkenal si penulis tu dibayar honorarium yg tinggi! Oh, AFY muncul lai koh? Dio bolon mulo buek kojo lai? Enjin eh bolon paneh? Oghang  yang dalam kumpulan ‘creative writing’ ni biaso eh kalau nak tulih artikel atau buek kojo boghek-boghek dio kono poi ‘hybernate’ dulu. Macam boghuang, ompek, limo bulan menghilang, tibo-tibo koluar dari dent bawak anak. Orang sastera pun macam tu. Kalau nak ajak bolanjo minam teh tarik inilah maso yang sesuai – kok tak telefon pun tak boghangkek!
Zahriman Alias:  Haaaa .... camtu laaa .... kito bukan nak bahaso sastera, kito nak bahaso orang pangka....

Abu Aman Bachik: Jobot apo pulak eh. Mang adek seh ni hebat oghang eh. Belajar eh poi Amerika. Kan dokek-dokek. Nun sebalik dunio nu tompek bolajar eh. Poh, ingat koman koman koh adek se ni? Dio mang banyak cito cito jenaka eh ni. Maso  dio duduk Penang ghin cemacam pengalaman eh tu. Nijam dio dah pencen ni nyak ilmu eh tu. Cito oghang Rohingya yo bekopok kopok tu. Ngan memain an adek se ni teh kau eh. Hebat orang eh tu!
Abu Aman Bachik: Yo, botolah tu Iman. Bahaso sastera bia an orang sastera lah kan. Kito bahaso orang panka ni lai kick kan?
 

 Nasaruddin Abu Bakar bersama orang rumah

Abu Aman Bachik: Dio lon poi Ngoram lai doh Li. Nunggu maso eh yo tu.
Abu Aman Bachik: Yo lah bumin tak mintak pulak. GY, oghang nak ucap an timo kasih orang tau lah. Cam alley cat tu hah.......mosehhhhhhh teh.
Ghazali Yasin: AFY, bagi pendapat ese duo pengalaman: 1) kisah AFY ponah tokolucheh, dan (2) pengalaman bokojo ikut budayo Jepon - sobona eh adalah satu rahmat Allah dan juga faktor ponyobab yang telah mengubah the journey of your life. Dari situ AFY telah bojaya menggerakan kekuatan dalaman dan bangun berjuang untuk mentransformasikan AFY menjadi A.F Yassin. Maso ese kojo dengan sebuah NGO dulu boss ese Ahmad Azam Ab. Rahman (mantan Presiden ABIM) ponah menogo  ese bilo ese bobal sobab sobuah institusi zakat tak bagi response positif tentang permohonan dana pendidikan untuk masyarakat pelarian Rohingya yang mana ese ditugaskan untuk menyelaraskannya. Boss itu sobakan ese dan ambik buku catatan usrahnya dan bagitau “sebenarnya kita semua tidak tahu tentang perancangan Allah - dalam surah Al-Buqarah 216 Allah berfirman yang maksudnya: Boleh jadi kamu benci pada sesuatu padahal ia baik bagi kamu dan boleh jadi kamu suka pada sesuatu padahal ia buruk bagi kamu. Dan (ingatlah), Allah juga Yang Maha Mengetahui (semua itu), sedang kamu tidak mengetahuinya” Tak lamo dari itu kito dapek borito baik dari sebuah badan amal. Bagi diri ese AFY, maso sokolah dulu pun punah. Lopeh Form V kojo di USM sebagai Jurutaip dan ponah diposondo oleh seorang steno semaso diintroduce kepada staf “Oh, male typist ah, I think you better wear a skirt to office tomorrow lah!” sambil kotawo. Maso tu bodonging tolingo. Apo bulih buek, nasib badan, toghimo yolah. Nak lawan kito baghu kojo dan tak boghapo yakin nak jawab dalam bahaso oghang putih kotiko itu. Nak coghito panjang bona, nanti kesah tokoluchir ni ese akan bisikan kek AFY bilo ada poluang jumpo nanti. Sungguhpun kojayaan ese biaso-biaso  yo, ese bosyukur. Alhamdulillah, ado 5 oghang anak (semuo pompuan) – yang sulung moningga waktu kochik. Cucu 7 (3 Lelaki dan 4 Pompuan).

Ghazali Yasin: Kato-kato  pujian Bang Abu tu bolon cukup kuek nak buekan ese melompek-lompek kogiangan doh! Kok nak dongar coghito Penang datanglah ko kampong se. Suruh Man bawak. Bawak orang sastera A.F Yasin sokali.
Ahmad Fadzil Yassin: GY, ZA dan AAB: Bahaso pangka apo ini, kalau maco dari mulo sampai abih komen GY ini bahaso yang digunoan mongalahkan bahaso oghang bahaso dan sastera. Memang ese kono tabik spring pado GY. Toingat ese komen yang dibuek oleh boghapo oghang komentar dalam posting Alumni TBSST yang dulu itu. Komen daripada Mikuman, Kich Noor, Sympathizer dan Faithfully Yours somuo eh superb bahasa eh, walaupun dalam bahasa Inggeris. Kaghang nampak eh kito dah ado GY yang lihai berbahaso. Sonang boto ese, maco eh pun soghonok. Dan boghisi. GY patut eh dah boleh mulo nulih pongalaman hidup eh dari TBS sampai ko la ini. Ini mungkin akan diikuti pulak oleh Hattar yang dah hampir sonyap kaghang, mungkin tongah hibernate kot. Dan bolon lupo AAB dongan sumbangan terbaghu eh. Takkan abih kek situ jo. Jugak Nasa Abu Bakar bilo laie nak buek citer baghu, pasal niago pun tak apo. Ese makin ghiang bilo maco posting. Tahan ese tingga an dulu assignment yang bolon mulo ini. Sobonar eh dah mulo tompi boghonti kojap bilo ada masalah domi masalah timbol. Tiigo masalah datang soghontak, adik ese yang moningga, biras ese yang kek wad dan mulo boghansor sihat dari barah usus dan prostate dan kaghang sopupu isteri ese masuk kolua sopital. Soghang sopita Soghomban (arwah adik saya), soghang sopita Serdang (biras ese) dan soghang laie sopita Solayang. Ado soghang laie anak buah isteri ese, masuk sopita Prince Court jugak keluar masuk. Inilah deh masalah yang sodang ese hadapi sokaghang. Lopeh satu, satu. Namun ese peganglah surah yang ditulis GY di ateh sobagai podoman. Somuo eh ada hikmah.

Zahriman Alias: Kau siap an rondang itek, nanti kito datang.
Ghazali Yasin: Bulih. Kok nak banyak den gulai tolo itek gaul pucuk ubi atau bolimbing buluh. Hai bosiut nanti. Tapi AFY tak jenis pomakan oghang eh. Dio bopantang bona!
Zahriman Alias: Takdo deh bopantang bona doh....kok sekali-sekali takpo....buek ubek.
Ghazali Yasin: Donga choghito oghang ghumah eh kawal makanan dio. Tak apolah untuk AFY ese buekkan gulai ikan haruan.
Ghazali Yasin: Mokasih AFY. Memang sodap bilo oghang Nogoghi dapek bobughak - cagho ciber pon sodap. Yg sobona eh, kek kampong ni oghang  kampong  laie pandai bobahaso, pandai mencolah dan buek lawak tak kogheng gusi. Ese ni mulo bolajar kek dio oghang. Bilo dapek associatekan dighi dongan A.F Yasin, AAB dan ZA (kita harap ramai yg lain masuk lubok sokali) ese ingat bulih stimulate minda dan minat kito nak menulis. Insya'Allah akan saya ikhtiarkan untuk  tulis pengalaman indah semaso di TBS dulu. Nijam ese tobayang-bayang AFY suko jalan dongan sapo, ABB ingin nak makan ikan tengalan, tompi guno pancing buluh yo. Si ZA pulak - dio ni budak lughus bondo - mano nak dapek. Ese ado yo coghito tapi tak bulih bagitau - burung di tangan terbang melayang. Hah hai TBS. Aku masih ingat pada mu!
 

Zahriman Alias:  Dah mulo .... dah mulo .... boleh bona lah tuuu .....

Ahmad Fadzil Yassin: Ese tak ado bopantang bona doh, bak kata ZA, sosokali ese sontal gak. Apo jo masuk macam ikan sobaghau dalam tongair. AAB dan ZA, amacam member kito ini dah stat pogang stereng. Dari gayo mukadimah GY ini kito konolah bosodio monoghimo apo sajo. Ese pulak makin toghujo bilo GY sobot ‘tobayang-bayang AFY suko jalan dongan  sapo’. Makin saspen ese dibuek eh. Ghaso eh ese ini macam ZA gak waktu di TBS luruih bondo, kok ado bondo yang bengkok pon kek sipi-sipi jo. Tompi ok jugaklah, sobab ese tak ponah tau apo oghang kato maso sokolah dulu. Nak donga jugak apa yang junior perhatikan.
Ghazali Yasin: AFY - Anggaplah itu rahsia! Boleh dibuko toghombo maso datang rumah ese nanti! Lazim eh bilo solalu jalan bodua tu kok tak kito yg togaso si dio pulak yang bodotik! Nampak eh nijam yg dokek koka sobolah AFY dah lain yo dah. Itu yang tak boghapo boghani nak cakap tu. Hah hai!

Zahriman Alias:  AFY, ese lailah ompong. Ese’ double desk leg’. Maso sekolah maghin satu Sukan pun tak main. Nasib baiklah belajar buleh tahan sikit. Tu pun kan pandai bebona pun. Sikit sikit aje. Tompi yang buek an seronok bebona tu dah tetuo ni baru tahu ado lak tino syok kek kito. Kok joman maghin kan bedongung! Hai nasib bodan!

Ahmad Fadzil Yassin

Abu Aman Bachik: Li tulih lam komen Ni lai bes. Tak yah tunggu poi kampung doh. Tak soba bona nak nonga eh. Holak kail buluh he patah koh, atau ikan tongalan eh tak nyontoh umpan eh. Padan muko eh kan. Anak orang kere nak membedek anak orang gomen. To kulat kulat cam cocak baham kapo. AFY, post an lah komen komen kek ateh tu. se ado cito baru lon siap lai. Sojak buah hati kito tarik diri kurang lah ummpph eh. Insya’Allah, akan se sudah an yo tu. nantilah. Kini iPad ni tongah boghobot mo cucu. Cuti sekulah ni!

Ghazali Yasin: AAB, tak apo lah. Balik dari kobun kang ese coghito sikit. nak poi bogosihan akar-akar pokok gotah dongan mem sokojap. Bye!

Ahmad Fadzil Yassin: AAB, ingat eselah, citer GY ini ado kono-mongono dongan apo yang ese fikir dongan apo yang u fikir agak eh. Sobab cagho GY cakap tu macam ‘kok tak kito yang toghaso si dio pulak yang bogotik!’ Ese pon tak soba nak nonga citer GY tu. Yolah GY, tak yahlah nunggu kito oghang ko ghumah U, tak  tahu bilo joman eh. Ese sotuju dongan AAB supayo GY citer yolah. Timo kasih  tak ado apo salah eh doh. Sobab ese pon nak bandingkan citer u tu dongan apa yang ese dan AAB fikirkan. Dan mungkin ado banyak laie citer lain yang junior lobih banyak tahu daghi kito oghang senior.Dah tuo-tuo ini kito dah banyak gentelmen, tak ado nak sentimen-sentimen doh, tomasok apo yang AAB sobot di ateh macam ‘anak orang kere nak membedek anak orang gomen. Tokulat-kulat!’

Ahmad Fadzil Yassin: AAB, ese ado info baghu dari kengkawan. Buah hati Faithfully Yours yang taghik diri tak nak komen laie tu ado anak limo duo pompuan. Ese ingat memang dio mintak anak pompuan eh yang nolong dio.

Abu Aman Bachik: Iyo koh, tak malu deh cito kek anak eh doh kan. Tompi ese ngoba an dio sendiri yang nulih eh tu. Tak do anak pompuan eh doh. Ah, dio yo tu. Tompi Kok iyo pun gasak dio lah kan. Kosa sikit dio dah boikot kito abih. Gak eh maco maco yo deh gak eh kan. Tingga lai dio bisu komen yo. Botuah punyo orang tuo. Maghin dio yang ngonyam ngonyam nyampok eh kan. Tongah seksodap dio lak bogonti . Ni sumo sympathyser lah nyo advise ni. Hari tu kek ghumah SS hubby eh kan main nogo seh lai doh. Siap kona an diri eh mo. cam dio tau yo si SA kito bini eh. Koh se yo peghasan! Ontah lah AFY. Cito kito si ompong beduo nie!

Abu Aman Bachik: Nai, bebaik ngan tercangkur lak kaki tu nanti. Ha langsung tak dapek cito nanti.
 

Kuih Godobung.

Ahmad Fadzil Yassin: AAB, sukar kito nak toko. Takut AAB yang poghasan jo sobab biaso eh dio tu di mana pon jumpo memang copek mosgho. Tompi donga khoba copek baghan pulak. Nantilah kalau kito ado poluang ko Gadong nanti ko Batang Nyamor ghumah akak Mohammad Ibrahim Februari nanti ese cadangkan kito poi samo-samo dongan ZA sokali. Nanti lopeh reuni kek Batang Nyamor tu bulihlah singgah kek kodai sopupu ese itu makan kuih godobung dan kito lalu dopan ghumah SA yang dah jadi hutan tu. Dokek yo ghumah eh lobeh kughang suku km jo dari ghumah omak ese. Jugak dokek ngan ghumah SS. Komudian kalau nak poi ghumah u kek Air Mawang, boleh gak dan singgah ghumah GY sokali.

Abu Aman Bachik: Iyo, boto kete kau eh AFY. Nak orang kere, mano nompan mo anak oghang gomen. Lawa bedongung lak tu. AFY, untung untung GY cito Pasal si SA kito kan. Ngang gak sikit nonga eh kan. Lamo beboto lak dio tak nyongok nyongok kito kan? Pai boto ati eh!

Ahmad Fadzil Yassin: AAB, jangan ghisaulah tu, sokogheh-kogheh ati eh macam koghak nasi yo, lamo-lamo togondam nanti lombotlah dio. Tunggu jolah. Kaghang ini mungkin dio holiday kot, anak eh bawak main-main kek luar nogoghi ko, dalam nogoghi ko, atau ado masalah koluargo, maklumlah koadaan dio bogitu. Kono soba jolah. Ese yakin dio yang dah bodongung nulis panjang lebar boghi komen satu haghi nanti tangan eh gata balik nak buek komen. Biaan dulu lah. 

Apam Johol

Nasa Abu Bakar:  GY,  kau suruh kakak kau atau ajar dio buka akaun FB dapek kami semua cite-cite kisah lamo-lamo  sebagai mengenang cite-cite TBS.
Zahriman Alias: Nasa Abu Bakar boleh bukak gambar gathering kito di rumah Salleh Simon, ado gambar Saripah cun ........
Abu Aman Bachik: Dio kan nikah mo school captain lah NASA . Silap kau tu. yang den tahu SC joman dio tu ialah KR. Iyo Nasa bukak lah gambar kek ghumah Saleh haghiitu. ZA ado ambik gambar Sipah. Bosa. Tengoklah, lopeh gak ghindu u kek dio!

Abu Aman Bachik: Yolah AFY tongah sobolah ni. Kengkadang togohingin yo nak maco komen eh. Nang bak kete kau, bahaso eh elok bobonakan! Cam orang pas tetinggi yo gayo eh kan. Hebat yo deh. Sunggoh pun seconggeng T3. Iyo lah sensorang tu adolah kelobehan eh kan AFY.

Ahmad Fadzil Yassin: Ese ingat botolah yang edit komen dio itu anak pompuan eh yang tuo yang pas universiti, mungkin luar noghori. Itu sobab Bahaso Inggeris eh boghabuk. Bilo u sobot namo eh tu toingat pulak ese satu potang dio datang ko ghumah ese di Gadong bawak sughat dan lopeh tu moncanak dio laghi pulang. Tak cakap sopatah pon dongan ese. Mulo eh ese heran apo sobab dio torus lari. Barulah komudian ese faham. Bilo ingat kesah tu dan toingat pulak citer u tu dah jadi citer kartun pulak, citer oghang mudo bilo jadi selebriti. Tak sangko toboto.

Dak Zimah (Nabjeah Aziz di Somobok

Nasa Abu Bakar: Entah lah den dah lupo kut. Bukan rindu cumo mengenang cite lamo sajo. Sapo KR tu.
Ahmad Fadzil Yassin: KR ini kan Khalid Rahman, School  Captain TBS tahun 1963, kalau ese tak silap lah. Ese hafal tu, tahun 1961 School  Captain AAB, tahun 1962, Param dan ese Vice-School  Captain jo dan tahun 1963 Khalid Rahman. Kalau tak boto AAB boleh boto an.

Ghazali Yasin: Semaso Form 1 & Form 2 dulu, seronok eh ketika recess. Bilo loceng bunyi, cikgu koluar kelas, ese menyelondek copek-copek, bolaghi sokuek hati nak boli wadi dan wasalodih (kueh lubang tongah macam donuts) kek satu mamak India bawa basikal kek tuck shop. Bawak duit 20 sen. Boli kueh tu togaleh yo poghut. Sosokali bila dapek duit lobeh, contoh eh abang ipar balik bocuti boghi duit, apo lai kito bojooh makan sakanlah. Pilihan ese - mihun sup campo tahu ikan tenggiri somangkok. Sungguhpun ‘sodagho’ Mr. Yap yg buek maso tu ese lapon yolah, nek moyang sodap! Kalau ado lobih duit lai boli air lamnet sarsi keluaran Long Chan. Kok tak ado duit, lopeh makan kueh poi togok air paip. Hongeh, sonak poghut, tak pulak sakit poghut doh. Kalau ado maso lai poi pulak bolakang sokolah caghik buah conoghai dan beweh – untuk vit C! Dah makan tu biaso eh ese dan kawan-kawan yang saiz kochik-kochik  macam ese jalan mundar-mandir ke dopan ko belakang sekolah. Maso tu setiap gerak-geri kawan-kawan, terutamo eh senior kito cukup seronok  poghati (Yang junior ni bolon goti apo lai – macam anak ayam baghu noteh!) Masing-masing mato tu liar yo momoghati oghang sodang bojalan, abang-akak sedang besembang, gelak-ketawa – suasano macam ayam dalam goban. Budak pompuan pakai skirt, ado yg toghankek punggung dan tobonjol dado walaupun maso tu masih anak dagho sunti lai – itulah yg sodap mato momandang. Kok ado senior yg bojalan (kata budak nijam bocoupling) anak mato kito nak meta ko situ yo deh. Kito yang kochik ni nompang giang tak tontu sobab! Maso tu couple yg paling harmoni, nampak cukup sodap mato momandang adalah pasangan AFY-Berita Harian. Dio oghang prefect dan bojalan boduo-duaan tu taklah nampak kolanggaan doh. Tapi dalam hati eh sapo yang tau kan. Mungkin dogupan jantung eh macam air cerek sodang mondidih! Ontah apo sobab eh kito suko tengok cagho dio bojalan samo-samo  – langkah dan lenggang samo macam askar bolatih kawat. Bilo tengok si teruna kacak dan si dara yang manja dan lawa itu berdua-duaan umpama burung enggang terbang sekawan di awan mako tak tokolit-kolitlah mato kito momandang. Kadang-kadang  sampai tobalik anak mato. Sambil jalan sambil sembang, kadang-kadang togolak-golak tokikik-kikik. Yang syok tengok eh maso sang bunga buek gesture tamparan ‘sayang’ kek longan. ‘Ah, you nih’, agak eh!. Maso tu syok ese tibo-tibo togaso macam tengok filem Hindustan - hero dan heroin sodang menyanyi dokek taman, boguling-guling sama! Semaso balik sekolah pun kami suko tengok dia orang. Kalau tak silap AFY-Berita Harian naik bas samo kot. Mungkin lopeh AFY-Berita Harian tamat sekolah dari TBS kito pun tak tau banyaklah tentang babak indah itu – bosambung koh atau tidak. Beberapo tahun lopeh tu ese tocompak kojo kek USM. Ese mati-matian ingat yang abang-kakak kito ni toghuih bosamo tompi donga cogito eh hujan tak sampai ko potang. Ontah mano silap eh kito pun tak tau. Tompi yg diganti, ikut raut muko eh tu, pun hebat yo maso dulu-dulu agak eh. Kan bang kan?. Walaubagaimana pun, ese fikir lamo yo moleleh air lior Bang oi! Setakat tu cukuplah AFY. Untuk AAB tunggu dulu, ese nak solat dan baghing kojap. Wassalam!
 

Ghazali Yasin menganggap ada seorang kengkawan dalam foto ini dipanggil Berita Harian. Sapo deh agak eh?

Abu Aman Bachik: AFY seen pun salah yo. Time Hamzah School Captain eh Akim Yim, time oghang  ghumah den form five, 1964. Hamzah batch oghang ghumah den. Beboto lah AFY, sumo eh dah menjauh an kito. Tinggalah kito terkonteng konteng kan. Sib baik GY soroto. Adolah seri eh sikit. Yang lain sumo nyo dah ninggaan kito AFY. Padan muko kito!

Abu Aman Bachik:  AFY, hebat beboto lak bahaso adek kito GY Ni kan poumpamaan eh kono boto pilihan eh yo lah yo anak Cikgu yo. Takkan buang bako deh do kan. Bak Kato Iman se patah eh bahaso GY nie mang menceriokan lah. Syabaslah adek se. Torus an lah kehebatan anda tu. Ese terkikik kikik nahan golak. Botuah boto budak namo GY nikan! Syabaslah adek se!

Ahmad Fadzil Yassin:  Itulah memang handa junior kito yang soghang ini. Ayat eh tosusun tak bocolaghu. Line of thinking very clear dan satu-satu kolua souleh-souleh. Bobakat mek-amek.  Kalau buek novel memang lanca citer eh. Jalan citer Junior ini boto-boto tosusun, tak payah laie nak kono edit doh. Ese baco pun tokekek-kekek kotawo bilo sampai ko tompek yang monggolikan hati. Sayang mek-amek ado yang macam air bahaso Inggeris eh dah monyopi pulak. Kan bagus kalau ado duo junior yang bagus , soghang dalam BM dan soghang laie dalam BI. Baghulah ummmph Tampang ni. Ese mulo eh tak poghasan kata pombayang eh Berita Harian tu, tompi tak boghapo saat bodotik dalam hati ese lalu tobayang apo bondo eh Berita Harian, lalu ese kotawo bosa. Memang bokias abih junior kito ini. Tahniah lah, kaghang ini ese nunggu geleran citer untuk AAB lak.

Ahmad Fadzil Yassin: Yang cito ini ese tak ingat nabona doh. Ghaso eh camno lak jadi gito yo, sobab ese dongan Berita Harian itu ado kono mongono dari satu koluargo, walaupon soghang insan dan soghan laie suratkobar. Yang ese tahu Berita harian dokek dan solalu balik naik bas dongan kakak ZA, Bedah. Ese satu kolas dongan akak Berita Harian yang namo eh Akhbar Harian. Cumo yang ese tahu bilo ese nikah Johor tahun 1967 ko 1966 bogitu Berita Harian ado datang moraikan. Maso itu agak eh Berita Harian ada pejabat kek Johor Bahru. Ghamai gak yang datang tomasuk Mikuman, kawan baik ese yang ese panggil Dak Abok (nama eh Nasir Mohd Noh), Hafsah Yahaya budak Istana Raja sokolas gak dongan ese dan arwah adik ese Amrah Yassin. Tak ado pulak ghaso bodotik dan baco dongan ponoh minat kandungan Berita Harian. Tak tahulah kalau ese ghonong jo Berita harian itu dan maco dalam hati ese dan maso itu lain yang ese peta kek sokolah dulu. Tompi mungkin gak sikit-sikit tu ado geeh bilo bak kato GY tosontoh longan itu toghaso jo paneh badan ese. Bak kato GY laie kalau tak ese bodotik yang soghang laie monggoletek. Yang ese tahu pado waktu yang samo Berita harian ghapat gak dongan OR. OR ini samo sokolas dongan ese dan OR ini ponah jadi DO Kolo Solango satu kotiko sobolom pindah jadi DO kek Tampin. Tak nyangko boto yo jauh ko situ GY pandang ese dongan Berita Harian. Tompi mokasihlah sobab citer dari kacomatoi GY sondighi. Paling-paling ese tahu gak ado junior yang moghatikan gorak gori senior selebrity TBS tahun 1962. Ini boleh bolanja minam cendo kek bas stand Thye Lye dokok Pulau Sobang tu. Sayng bas itu dah tak ado laie.
 

Kakak Salbiah Ibrahim (kiri) ketika menyambut ketibaan Allahyarham Datin Roznah Md. Jan pada majlis merayakan Hri Ulangtahun adiknya, Mohammad Ibrahim di Tonyamor. .

Ghazali Yasin: AFY/AAB/ZA, Oh camtu coghito eh. Kito manolah tau. Asal nampak yo sosiapo bojalan boduo tak ado lainlah dalam otak juniors maso tu. Mungkin masa tu tak cukup matang lai. Bolon pandai bona nak buek telekan. Ini sumo salah ZA sobab dio tak update ese boto-boto. Kok tidak komen ese di ateh tu boleh dibaikpulih dan diolah baik lai untuk dimuatnaik dalam Tampang.

Ghazali Yasin: Tontang AAB ni bimbang yo ese nak coghitokan sok sek yg ese dongar dulu. Maso ese Form 1 AAB baru tamat Form V dan jadi guru somontagho di TBS. Maso tu dio tak nampak macam guru tumpang sobab caro dio bojalan tu nampak sebagai guru senior dan begitu berketrampilan. Lagi satu, AAB maso tu wataknya nampak serious bona. Budak-budak monikuih. Tompi AAB tak ado ngajar kelas ese doh. Kalau macam tu apo lai makwe yg dipeta eh tu pun kocot poghut eh. Maso Form 1, si RA (kok tak silap) samo kelas dongan ese. Oghang eh  lawa, natural beauty - mirip seniwati Latipah Omar. Tapi apokan dayo bungo idaman dah dipagar anak jiran sobolah ghumah. Itulah yang ese tau. Kok ado coghito lain mintaklah sapo-sapo tulih sikit. Dah sampai di ponghujung dahan ni tak apo coghito doh supaya coghito indah-indah  tu dapek ditulih dan disimpan sebagai arkib TBS.

Ahmad Fadzil Yassin: GY, kono baikpulih jalan citer tu dan nak postkan dalam Tampang. Duo citer dalam satu AFY/AAB di TBS. Citer AAB maso jadi School Captain tak ado ko?  Ghaso eh misti ado, cuma nampak eh macam GY tak nak citer banyak tontang selebriti TBS AAB ni. Kok citer ese panjang bona, sampai ko citer AAB jadi pendek lak.

Abu Aman Bachik: Sapo deh RA tu hah Li. Ese ingin nabona nak tau ni. Anak jiran tu sapo pulak yang dah arwah tu koh. Jiran kek mano? Kek AM koh? Sapo deh RA hah? Roxana Aziz , Rohana Aziz, Ramlah Aziz. Rapeah Abu, Rosina Ahmad koh? Ado yang kono toko ti tak, Li? Koba an lah ha!

Ghazali Yasin:  AAB: sumo tekaan AAB dobush bolako. Tak polah, ini coghito lamo, puluhan tahun dah berlalu. Eloklah ese sobut budak RA tu budak Tanjung Rimau atau Pulau Sobang. Ayah eh stesen master kotapi. Yang pagar dio tu dulu jiran eh yo. Ngaho,bukan yang tu koh?

Abu Aman Bachik: Kau tau sumo cito orang kan Li. Memang kau memeta yo gak eh yo. Eden sendighi tak ingat kesah RA tu lai doh kau buleh ingat! Memori kau beboto cam kamera lah kan. Manis pulak konangan yang kau imbau kan tu Li. Eden jam tu penakut bebona. Kok den beghani memasang jorek jam tu maun yo nyinggah gak eh kan. Tompi Eden soda diri den sapo. Tu sobab eh den takut bebona, ngurat ngurat nie. Takut kok kono tuiiii an. Elok yo tetakut nie kan?

Ahmad Fadzil Yassin: nanti ese ubah bahaso dan cantumkan 2 jadi 1.
 

Buat pertama kali Grup TBSST bertemu di Kedai Kopi di Shah Alam, 1 Mei 2012.

Abu Aman Bachik: Den dah agak dah. Tompi den dah lupo namo eh. Mano deh buah hati den tu maghin gak eh kan? Ado ko deh tidak lai. Eeeeee sogham sojuklah Raso bodan den lah Li. Camnolak kau tau den mang minat kek dio ha Li. Den ado cito kek abang ekau koh hah? Raso den tak do cito kek sesapo doh. Yang den SS kan dio do, ZAB. AFY pun syok yo kek dio. Baco lah selendang sotoro, cerpen AFY, hebat. Ni kisah labu labilah. Carik lah posting awal blog alumni TBSST. Situ kau jumpo.
Ahmad Fadzil Yassin: Bukan labu labi laie doh dah jadi citer cacamerbo dah tunggang tobalik macam citer koluargo 69...

Ghazali Yasin: Hai giang amek hati ese. Kali ni mongono. Ok nanti ese buek sedikit research dan lopeh tu bodontum muatnaik ko TBSST. Ese satu kelas dongan dio. Kok tak silap jaman Form 2. Maso tu ese dilayan macam budak kochik (memang kochik pun. Not dangerous at that time ... but not now!). Ese ini ibarat anak tikus yg dapek ditangkap sang kuching. Tak ondak dimakan eh doh. Diotek-otek eh, buek main yo. Jadi dio boganilah bisikan kek se Bang Abu! Hai, apo nak buek. Tak dapek nak bawak si cantik molek tu ko Air Mawang. Yang AFY syok kek dio tu baghu ni ese tau. Itulah, tak baco dulu 'Tetak kandang jelujur kandang, bukan pandang sebarang pandang, pandang dengan rindu, rindu Allah rindu Mohd, Kobul Allah, Kobul Muhammad' Lopeh tu doalah supaya bukokan pintu hati si .... tu supaya dokek ko jantung hati kito. Itu doa ayat tosirat jam dulu. Nijam tak leh pakai lai doh Bang Abu  ... bodoso. Wallahualam!
 

Ghazali Yasin: Oh lupo jawab satu lagi query AAB. Ese tak tau mano RA sekarang.  Hanapi Hassan, yang samo batch dongan laki eh tu dulu buleh confirm. Hai, dapek tau mano dio ado nijam pun dah cukup melogokan hati kan Bang Abu?

Abu Aman Bachik: Yo boto kete kau Dek oi. Kok dapek nampak bumbung ghumah eh pun jadi lah nang kete kau eh, Kok dapek jumpo dah tetuo nie lailah TAMBAH uuummph eh kan. Tompek jatuh lai tikonang, apo lailah ompek hati terpelengotkan?

Abu Aman Bachik: La iyo koh AFY. Cam no lak tu. tak nampak kek se donai eh tu doh.

Ghazali Yasin: ABB, Kok Hanapi sahkan boto ese bulih tolong  hantar poi tengok ghumah eh. Bulih masuk kojap lopehan ghindu. Agak eh malam tadi payah mato abang ese ni nak lolap agak eh? Kito tunggu apo kato AFY dulu - mungkin dio tongah wirid lai ni. Dio pun lambek tido malam  tadi!

Ahmad Fadzil Yassin: GY/AAB nak poi mano ni dan bilo, ese anytime yo...

Ghazali Yasin: Hah hai, ini golo dek eh. Nampak sumo bogajat nak poi ziarah cintan AAB yang dah  tolopeh kek junior dio tu lah. Kok camtu kono bawak ZA sokali.

Ahmad Fadzil Yassin: Memang pon kalau ese poi Soghomban umah Hanafi, ese follow ZA, dan dio sotuju nak jompot ese kek ghumah ese Sg. Buloh. Mungkin nak tau dongan CLA dan AAB, nak konvoi samo tak atau poi sobuah duo keto jo. Kono susunlah toboto sobab ni nak jolajah Gombau, Sogomban dan Johol ni, marathon ni. Abih nak poie somuo, baik ikut samo yo tak?

Ahmad Fadzil Yassin: Eloklah kalau Tuan Presiden kito ZA kordinet bondo ini. Kono tanyo bos dulu boto tak?

Ghazali Yasin: Kolanjo an tu Man elok ajak kawan-kawan lain samo – jangan tingga an Salleh, Aziz, Nabjeah dan yang motan-motan eh.

Zahriman Alias:  Banyak boto popatah orang tuo yg kau ado GY. Seghonok pulak den nonga eh .... kau ni elok bona bokawan ngan Aziz Ujang .... .dio tu tak abih-abih ngan pantun seloka eh. Lagi pun budak Ajih tu bab-bab Adat Popatih kito ni sumo di ujong jari eh yo .... Tapi rugi bona ghaso eh kito, si Ajih ni tak ghoti nak berfb .......
 

Ghazali Yasin: Holak Ajis tu camtu Man? Dulu dio kojo kek kapal toghobang tontu tododah dongan sistem komputer. Agak eh dio ni bilo dah pencen dah jadi golongan ahli kitab. Dio duduk mano nijam? Kali terakhir jumpo dio somaso anak potamo kau nikah kek Kuala Selangor dulu. Ingin yo hati nak bolaja tontang Adat Popatih ni kek dio. Dio memang petah bocakap.
Zahriman Alias: Dio duduk kampong nijam kek Mobok, dio lobeh kurang cam den yo suko jadi orang kampong. Den pun borajat bona nak poei nengok kehidupan dio di kampong ... .mesti banyak ayam itik eh. Dio ado ghumah di Shah Alam, mulo-mulo dulu dio terpakso duduk kampong menjago omak eh yang tak sihat. Dio balik pun sorang yo sobab bini eh dongan anak-anak pulak di Shah Alam. Sekarang omak eh dah meninggal dan dio dah duduk toghuih kampong. .. .Dan bini eh pun dak ikut dio sekali.......Jom minggu dopan kito poei ramai-ramai ..... lopeh kenduri rumah dak Johari di Sogomban, kito cau poei Mobok kojap.
Ghazali Yasin: Setuju. Lopeh tu kono datang ko rumah ese - tak jauh dari Gombau doh - dari Kampong Batu ambik maso 20 minit yo sampai Kualo Johol. Ese pun baghu bolo ayam kampung - baghu botaktih. Bakhtiar Hitam pun duduk kampung yo kan?
Ahmad Fadzil Yassin: Elok nabona lah tu, bueklah arrangement, kito raun sobuah NS. Kok ado AAB poi ghumah e sokali dan arwah MZMY. Tengok ghumah eh pon jadilah nak sodokah Fatihah pado arwah tu. On the way back bulihlah singgah ghumah ese kojap kek gadong sobab ese dah order godobung kek adik pompuan ese. Tompi waktu itu mungkin dah sojuk kot sobab biaso eh sopupu ese yang buek godobung kek kodai dio itu buek sobolah pagi yo.
 

Ghazali Yasin: Ok Man, bola nijam kek kaki kau. Ese ngikut yo.

Abu Aman Bachik:  Li den memain yo kek ateh tu nak nyongok RA. Mintak maaflah. Soram sojuk lak ghaso bodan den. Den kan biaso bercakap sepatah pun ngan dio maghin. Alah hai, tak ondak den doh. Usahlah sesusah an nak mintak HH confirm an. Tak yah doh. Timo kasih yo lah bebanyak, dek oi ombong eh! Tak tokilan sebosa habuk pun den doh dek oi. Kok nak jumpo Nora eh buleh lah. Kok ado deh lai. Dio tu yo boto tompek hati terpaut maghin. RA tu tak ponah cakap sepatah pun ngan dio. Kok kau nak jumpo, poilah. Pai an Salam den yo. Itu pun Kok dio kona den lai. Kok tak buek jobo yo. Moseh yo lah dek oi!

Zahriman Alias:  Boleh jugak singgah rumah kampong sei maso dalam perjalanan dari chongkau ko Mobok...... adik sei yang duduk di situ.
Ghazali Yasin AAB, Ese dah faham bona Bang Abu ni. Acah yo lobeh. Bak kato arwah abah ese maghin.’"Cakap yo loguh logak tompi tak boghani. Macam oghang cacak kayu pagar - angkek yo tinggi tompi masuk eh tak dalam’. Abah ese dulu sungguhpun kochik yo oghang eh tompi handa! Tompi kek anak eh tak pulak doh – jonih boghani-boghani  takut. Tompi boghani sikit dari AAB!
(Catatan: Dialog panjang di atas disiarkan in toto tanpa suntingan dan menggunakan dialek Negeri Sembilan.)
 

Ghazali Yasin ZA: Jadi, sampai rumah ese dlm kul 4 potang (25/12) lah yeh? Kok camtu minam teh tinggilah kito nanti. Kami sekeluarga mengalu-alukan ketibaan abang-abang, kakak-kakak dan adik-adik semuo (termasuk Dato'-Dato’ dan Datin-Datin sokali).
Abu Aman Bachik: Iyo lah tu dek se oi. Bang bak apo eh lah. Janji cito kito dah siap. Kito dah hongeh nunggu eh dah ni. Lelai bolon yo, lelai bolon yo. Lambek nabona lah siap eh. Janji eh loguh logah teboto. Kito telangok-langok lah nanti eh. Sodap nabona koh gek eh? Payah nabona pulak siap eh!
Ghazali Yasin:  AAB, Insya’Allah siap tak lamo laie. Lazim eh tiap-tiap yang elok nak buek tu kono ambik maso yang lamo. Yang compek cincai bocai yo tu sapo pun tak ondak maco eh sok. Biarlah lambek sikit. Wassalam!